Գրքեր

Տեր Գրիգոր քհն. Գրիգորյանի շնորհավորական խոսքը՝ Ծաղկազարդի տոնի կապակցությամբ

Սիրելի՛ եղբայրներ և քույրեր ի Քրիստոս,

Մեծ ուրախությամբ շնորհավորում եմ ամենքիս Ծաղկազարդի գարնանաբույր, հրաշալի տոնի կապակցությամբ: Ն.Ս.Օ.Տ.Տ. Գարեգին Բ Ամենայն հայոց կաթողիկոսի բարձր տնօրինությամբ այս տոնը հայտարարվել է երեխաների օրհնության օր, ուստի խոսքս առավելապես ուղղում եմ այն մարդկանց, ովքեր Աստծո օրհնությամբ ծնող կոչվելու բարձր շնորհին են արժանացել և այսօր իրենց զավակների հետ միասին շտապել են եկեղեցի՝ իրենց խոնարհումն ու օրհնաբանությունները բերելու Երուսաղեմ մուտք գործող Փառապանծ Արքային:

Սիրասո՛ւն մայրեր և բարեպա՛շտ հայրեր, մեր Տեր Հիսուս Քրիստոս անգին գանձեր է ուղարկել ձեզ՝ ի դեմս ձեր զավակների: Նա ձեզ է վստահել այդ անաղարտ հոգիների դաստիարակությունը՝ մեծ պատասխանատվություն դնելով ձեզ վրա: Սակայն Բարեգութ Հայրը երբեք միայնակ չի թողնում Իր արարածներին, քանզի արարումից առաջ իսկ սիրեց մարդկանց և մինչ ձեր զավակների ծնունդ առնելն արդեն հոգացել է նրանց ճիշտ և աստվածահաճո դաստիարակության մասին՝ որպես ուղեցույց տալով Սուրբ Գիրքը, սրբերի վարքերն ու եկեղեցու հայրերի աշխատությունները: Մայր Եկեղեցին էլ, հիմնվելով այդ ամենի վրա, չի դադարում օրնիբուն աղոթել, խրատել և ուսուցանել ձեր և ձեր զավակների աստվածադիր անմահ հոգիների փրկության համար:

Այո՛, սիրելինե՛ր, դուք ծնել եք ձեր զավակներին մարմնապես, սակայն մարդուն մարդ դարձնող անմահ հոգու ծնողն Աստված է, ուստի բոլորի հոգիները պետք է ուղղված լինեն դեպի իրենց կենդանություն պարգևող Լույսը: Եվ ծնողներն են, որ պետք է գիտակցեն, որ հոգատարության առաջնահերթությունը պետք է իրենց զավակների ոչ թե մարմնի կարիքներին տան, այլ՝ հոգու: Օրնիբուն չմտահոգվեն իրենց երեխաներին նյութական հարստությամբ ապահովելու մասին և մոռացության մատնեն հոգևոր հարստությունները, որպեսզի չպատահի թե զավակները հասունանալով միայն նյութական ժամանակավոր բարիքներով ապահովված մարմիններ ունենան, և կորցրած լինեն ամենաթանկարժեքը՝ սիրտն ու հոգին: «Այն հայրերը, որոնք հոգ չեն տանում իրենց զավակների պարկեշտության ու համեստության մասին, մանկասպաններ են և ավելի դաժան, քան մանկասպանները, քանի որ այստեղ խոսքը վերաբերում է հոգու կործանմանն ու մահվանը»,- ասել է սուրբ Հովհան Ոսկեբերանը:

Երկարաշունչ ճառերով մի՛ հոգնեցրեք ձեր զավակներին, սիրելի՛ ծնողներ, այլ բարեպաշտության կենդանի օրինակ եղեք նրանց համար: Թող քրիստոնեավայել ձեր կյանքը դեպի աստվածահաճո ընթացք ուղղի ձեր զավակների քայլերը: Աստծո և մերձավորի հանդեպ ցուցաբերած ձեր սերը թող սովորեցնի նրանց սիրել, ձեր աղոթքներն՝ աղոթել, ողորմության ու ներողամտության գործերը՝ բարեգութ լինել: Ես էլ աղոթում եմ Երկնավոր Հորը, որպեսզի խոնարհությունը, եղբայրասիրությունը, հեզությունը, աշխատասիրությունը, ողորմածությունը, ժուժկալությունն ու ողջախոհությունն այսուհետ ձեր զավակների անկողոպտելի գանձերը դառնան և ուղղեն նրանց դեպի հավիտենական փրկություն: Ամեն:

 

Տեր Գրիգոր քհն. Գրիգորյան

Զորավոր Սուրբ Աստվածածին եկեղեցու հոգևոր հովիվ

09.04.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․