Գրքեր

Տեր Գրիգոր քհն. Գրիգորյանի Սուրբ Ծննդյան շնորհավորական խոսքը

Սիրելի եղբայրներ և քույրեր ի Քրիստոս,

Անսահման երախտագիտությամբ փառաբանում եմ Երկնավոր Հորը և անսքող ուրախությամբ շնորհավորում ձեզ «տոների մոր»՝ Սուրբ Ծննդյան պայծառաշող տոնի առթիվ:

Այսօր հայ եկեղեցիները վերածվել են հոգևոր Բեթղեհեմի, որոնց սուրբ կամարների ներքո տեղի է ունենում տիեզերքի մեծագույն հրաշքը: Բեթղեհեմյան հովիվների և արևելքից եկած մոգերի հոգևոր ներկայությանն ենք միանում նաև մենք և նրանց հետ միասին շտապում մեր ակնածալից երկրպագությունը բերելու Մանուկ Քրիստոսին:

Այսօր Երկնային Հոր ծոցից Նրա անեզր Սերը ծնվեց մսուրում, որպեսզի զոհաբերի Իրեն հանուն քո՛ փրկության, սիրելի՛ հավատացյալ: Այսօր բեթղեհեմյան քարայրում ծագեց Արդար Արեգակը, որպեսզի կյանքիդ ընթացքն ազատվի կորստաբեր խավարից և երկրային օրերդ Նրա կենսատու ջերմությամբ լցվեն, սիրասո՛ւն բարեկամ: Այսօր Սուրբ Կույսից անարատ ծնունդ առավ Անսկիզբն ու Անվերջը, որպեսզի սկիզբը դնի քո՛ հոգևոր վերածնունդի և վերջը՝ մահաբեր կորստյան: Արդ, թող հոգիդ ցնծա երկնային անանց ուրախությամբ, և սիրտդ խայտա աստվածային սիրո առատությունից, բարեպա՛շտ քրիստոնյա: Աշխարհի խավարում լույս տվող սուրբ և առաքինի կյանքդ թող որպես ոսկի ընծայվի Անհաղթ Արքային՝ փառաբանելով Նրա ամենակարող զորությունը: Մերձավորիդ հանդեպ տածած սերդ, ողորմածությունդ, ուշադրությունդ ու հոգատարությունդ թող կնդրուկի քաղցրանուշ բույրով պարուրեն Անսպառ Մարդասերի սուրբ մսուրը: Իսկ աշխարհի գայթակղություններին դիմակայելու, չարի առաջարկած մեղքերից հրաժարվելու և որպես հին մարդ մեռնելու վճռականությունդ թող որպես զմուռս նվիրաբերվեն մեր Մարմնացյալ Փրկչին:

Մաղթում եմ, որպեսզի Աստվածորդու Սուրբ Ծննդյան տոնի խորհուրդը սրբազան երկյուղածությամբ լցնի ձեր հոգիները, և Մանուկ Քրիստոս ծնունդ առնի յուրաքանչյուրիդ սրտում՝ սրբագործելով և վերակենդանացնելով այն: Թող Մարդացյալ Աստծո ծննդյան օրը խաղաղության ծածկոցով սփռվի համայն աշխարհի վրա և մեղմացնի նույնիսկ ամենակարծրացած սրտերը: Թող բեթղեհեմյան ավետաբեր աստղը որպես անմար կանթեղ վառվի բոլորի հոգիներում և հիշեցնի, որ Ամենազոր Աստված սիրում է մեզ և մարդացել է մեզնից յուրաքանչյուրի փրկության համար: Ուստի, մենք էլ որդիական սիրով և երախտագիտությամբ միանանք երկնային զորքերի բազմությանը և օրհնություն երգենք Տիրոջը՝ ասելով. «Փա՜ռք Աստծուն՝ բարձունքներում, և երկրի վրա խաղաղությո՜ւն և հաճությո՜ւն՝ մարդկանց մեջ» (Ղուկ. 2:14), քանզի. 

«Քրիստոս ծնավ և հայտնեցավ: Մեզ և ձեզ մեծ ավետիս»:

 

Տեր Գրիգոր քհն. Գրիգորյան

05.01.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․