Թող Տերը զորացնի Ձեզ Ձեր աստվածապարգև կոչման մեջ
«Մահ իմացեալ՝ մահ է, մահ ոչ իմացեալ՝ անմահութիւն է: Որ զմահ ոչ գիտէ՝ երկնչի ի մահուանէ, իսկ որ գիտէ զմահ՝ ոչ երկնչի ի մահուանէ» Եղիշե պատմագրի շուրթերից հնչած բարոյական արիության այս դասը, հերոսական այս ոգին հայ ազգին ներշնչեցին այն քաջարի հոգևոր հայրերը, ովքեր Սուրբ Ղևոնդ քահանայի անունով կոչվեցին Սուրբ Ղևոնդյանք: Հայ հոգևորականության ըմբոստ ոգին և քրիստոնեությունը պաշտպանելու պատրաստակամությունն իր արտահայտությունն է գտել Եղիշեի հետևյալ տողերում. «Յայսմ հաւատոց զմեզ ոչ ոք կարէ խախտել, ոչ հրեշտակք և ոչ մարդիկ, ոչ սուր և ոչ հուր, ոչ ջուր, ոչ ամենայն զինչ եւ են դառն հարւածք»: Սուրբ Ղևոնդյանք, հերոսաբար նահատակվելով, անմահացան՝ իրենց հետնորդներին կտակելով հայոց ազգի անմահ անունը: Հայ եկեղեցին առ այսօր տոնում է սրբերի շարքը դասված անմահ հայրերի սուրբ հիշատակը՝ ուխտելով անցնել այն հերոսական ուղին, որ անցան ազգի ու հավատի նվիրյալ հայրերը:
Սուրբ Ղևոնդյանց տոնի հիշատակության օրը նաև Հայ եկեղեցու հոգևոր դասի տոնն է: Այս առթիվ Զորավոր Ս. Աստվածածին եկեղեցու ծխական խորհուրդը և համայնքը ի սրտե շնորհավորում է հոգևոր անդաստանում իրենց ծառայությանը նվիրված հոգևոր մշակներին, ովքեր, Սուրբ Ղևոնդյանց օրինակի համաձայն, ոգեշնչում և պատգամում են հայորդիներին անշեղ ընթանալու հայրենիքի, ազգի և եկեղեցու զորացմանն ուղղված ուխտի ճանապարհով: Թող Տերն օրհնի Ձեզ՝ Հայ եկեղեցու անխոջ մշակներիդ, և արժանացնի հայրենաշեն ու եկեղեցանվեր ծառայության քաղցր պտուղները ճաշակելու պարգևին:
«Որևէ մեկն ինքն իրեն չի կարող տալ քահանայապետության պատիվը, այլ Աստված է նրան կոչում այդ պաշտոնին» (Եբրայեցիներ 5:4): Մեր մաղթանքն է, որ Տերը զորացնի Ձեզ Ձեր աստվածապարգև կոչման մեջ՝ արգասավորելով Ձեր հոգևոր ընթացքը Հայ ազգի և Հայ եկեղեցու կյանքից ներս: