Աստված օրհնի: Նախ պիտի ասենք, որ Սողոմոնի Իմաստություն գրքում Հիսուս անունը չի հիշվում, այլ օգտագործվում է «Աստծու որդի» արտահայտությունը։ Եթե անգամ վերոնշյալ Սուրբգրային արտահայտությունը վերագրում եք Հիսուսին, Սողոմոնի Իմաստություն գրքի հեղինակը ձեր ասածի ճիշտ հակառակն է ասում։ Նրանք փորձում են Աստծուն և իրենց կասկածն են հայտնում Աստուծո գոյության, ամենազորությանը։ Հիսուսի մահվան մասին արդեն իսկ Ծննդոց գրքի 3-րդ գլխից սկսած խոսվում է։ Գրեթե բոլոր մարգարեները այդ մասին խոսում են։ Եվ եթե ուշադիր լինենք Նոր Ուխտը մեզ նոր բան չի ասում, այլ փաստում է Հին Կտակարանի ասվածի իսկությունը։ Նոր Կտակարանը մեզ ասում է, որ Հին Կտակարանը իրականացավ Նոր Կտակարանում։ Այստեղ որևէ բան չկա թաքցնելու, ամեն բան շատ բացահայտ է և հստակ։

Ինչ վերաբերում է, թե ինչու Սողոմոնի Իմաստություն գիրքը չկա որոշ Աստվածաշնչերում, պատճառը հետևյալն է։ Հին Կտակարանի 7 գրքեր՝ Սողոմոնի Իմաստություն, Սիրաքի Իմաստություն, Բարուք, Ա, Բ և Գ Մակաբայեցվոց գրքերը, Ա Եզրաս և Տոբիթը երկրորդականոն գրքեր են։ Երբ ասում ենք Երկրորդականոն, հադկանում են, որ Եբրայական կանոնից բացակայում են, այսինքն հրեաների համար անընդունելի են և Ադտվածաշնչի կանոն են մտել ավելի ուշ շրջանում։ Այսինքն ընդունելի են միայն քրիստոնեաների համար։ Դրա համար մենք պետք է հասկանանք, թե որ Աստվածաշունչի ինչ կանոնի է հետևում։ Մեզ հայերիս համար ընդունելին Մայր Աթոռի հրատարակությունն է և մեզ համար այս գիրքը միշտ ընդունելի է եղել։ Հայերենով կան բազում Աստվածաշնչեր, որոնք հետևում են տարբեր կանոնների։ Սա նորմալ է, որովհետև նաև անհրաժեշտություն է ուսումնասիրելու և Աստվածաշնչի կանոնի պատմությունը հասկանալու համար։