Պատասխան - Ինչո՞ւ միայն Հրեաստանում պիտի լիներ այդ հրաշքը, չէ՞ որ քրիստոնեական հավատքն ամբողջ աշխարհում պիտի տարածվեր՝ սրբազան Առաքյալների քարոզչությամբ: Հետևաբար ամբողջ աշխարհի վրա եղավ խավարումը, ուր Քրիստոսի սքանչելագործությունները չէին տեսել և չէին իմացել: Արեգակի այս հրաշք խավարմամբ Առաքյալները կարող էին հավատքի դարձնել շատերին: Մանավանդ հեթանոսների մեջ եղած երևելի աստղագետներին բավական էր արեգակի այդ հրաշք խավարումը, որպեսզի հավատային Քրիստոսի Աստվածությանն ու մարդեղությանը: Ճիշտ այդպես Դիոնեսիոս Արիսպագցին, հեռավոր երկրում լինելով, արեգակի խավարումը երբ տեսավ, այսպես ասաց. «Կա՛մ բնության արարիչն է չարչարվում, կա՛մ աշխարհի շինվածքն է կործանվում»: