Հարությունից հետո Քրիստոս երևաց աշակերտներին և ասաց. «Խաղաղությո՜ւն ձեզ. ինչպես իմ Հայրն ինձ ուղարկեց, ես էլ ուղարկում եմ ձեզ»։ Երբ այս ասաց, նրանց վրա փչեց և ասաց. «Առե՛ք Սուրբ Հոգին։ Եթե մեկի մեղքերը ներեք, նրանց ներված կլինի. եթե մեկի մեղքերը չներեք, ներված չի լինի» (Հովհ. 20:21-23): Այս ասելով Հիսուս ևս մեկ անգամ կրկնեց ու հաստատեց նրանց առաքելությունը, որի իրագործման համար հավելյալ հոգևոր ուժ էր անհրաժեշտ նրանց, որն էլ տվեց Սուրբ Հոգին փչելու միջոցով: Դրանով Նա նախապատրաստեց կամ ընդունակ դարձրեց աշակերտներին խոստացված Սուրբ Հոգին՝ իր ողջ զորությամբ ու շնորհներով ընդունելու, ինչն էլ տեղի ունեցավ Պենտեկոստեի ժամանակ: