Առաքելություն, որին կոչված են Քրիստոսի Մարմնի անդամները

Եկեղեցին, ըստ Սուրբ Գրքի, Քրիստոսի Մարմինն է (Եփես. 1:22): Եկեղեցական կյանքին հաղորդ է նա, ով իրապես Քրիստոսի Մարմնի անդամն է և ով եկեղեցական արարողություններին մասնակից լինելուց զատ իր հնարավորություններով մասնակից է այն առաքելությանը, որին կոչված են եկեղեցուց ներս ձևավորված համայնքները: Այդ առաքելությունը սիրո ծառայությունն է, որով կենդանի ու գործուն է դառնում եկեղեցին, այդ սիրո ծառայություններով են Քրիստոսի Մարմնի անդամները, միմյանց օգնելով,  քայլ առ քայլ Աստծուն մոտենում: Համայնքն իր գործունեությամբ առաջնորդվում է Աստծու և մերձավորի հանդեպ սիրո գլխավոր պատվիրաններով:

Զորավոր Ս. Աստվածածին եկեղեցու համայնքը հերթական անգամ կյանքի կոչեց իր սիրո ծառայությունը՝ աջակցելով Արցախից բռնահանված մի ընտանիքի: Նոյեմբերի 8-ին եկեղեցու հոգևոր հովիվ Տեր Գրիգոր քահանա Գրիգորյանը, եկեղեցու սոցիալական ծրագրի շրջանակում,  Արցախից բռնի տեղահանված  Դադայան Վազգենին (27 տ.) փոխանցեց դրամական աջակցություն  (100 000 դրամ), որ տրամադրել էր եկեղեցու համայնքը: Վազգենն իր կնոջ, զավակի, ծնողների, եղբոր, տատիկի ու պապիկի հետ բռնի տեղահանվել է Մարտունու շրջանի Գիշի գյուղից: Վազգենի եղբայրը մասնակցել է Արցախյան 44-օրյա և 2023-ի սեպտեմբերի 19-ին Ադրբեջանի կողմից սանձազերծած պատերազմներին: Բազմանդամ ընտանիքն այժմ բնակվում է Կոտայքի մարզի Պռոշյան գյուղի Գ. Չաուշ փ. 17/2 հասցեում:

«Անչափելի է սիրո ուժը։ Ո՛չ երկնքում, ո՛չ երկրի վրա չկա ավելի թանկ բան, քան սերը: Նա է առաքինությունների գլուխը, օրենքի լրումը: Սերն երկնքից երկիր իջեցրեց Աստվածորդուն, կործանեց մահը, դժոխքն ավերեց, Ադամին հետ կանչեց, դրախտի դռները բացեց և Երկնքի Արքայության խոստումը տվեց: Այն իմաստուն դարձրեց ձկնորսներին, զորացրեց նահատակներին, անապատները վերածեց կացարանների, այն սաղմոսացությամբ լցրեց սարերն ու որջերը, սովորեցրեց ամուսիններին քայլել նեղ ու դժվարին ճանապարհով»,- ասել է սբ. Եփրեմ Ասորին:

Կարինե Սուգիկյան