Երկրպագություն|Erkrpagutyun



Գրքեր

Երկրպագություն

«Աստծոյ երկրպագեսցուք»

Սուրբ Պատարագի ժամանակ սարկավագի կողմից ասված այս խոսքերին անմիջապես հաջորդում է մի գործողություն: Ներկաները, երեսները խաչակնքելով և խոնարհվելով, երկրպագում են:

Երկրպագությունը հոգևոր բարեպաշտական արարողություն է, այն աստվածպաշտության ժամանակ կատարվող սրբազան գործողություն է, որ կատարվում է Սբ. Պատարագի և մյուս խորհրդակատարությունների ընթացքում: Բոլոր եկեղեցական արարողությունները, ծեսերը, տոները, ժամերգությունները երկրպագություն են Աստծուն՝ ի դեմս Սուրբ Երրորդության երեք Անձերի, ինչպես նաև սրբերին և մարգարեներին՝ որպես հարգանքի, ակնածանքի, անվերապահ հեղինակության ընդունում սեփական անձի, կյանքի և գործերի նկատմամբ: Երկրպագություն կատարում են պատարագիչ քահանան և հավատացյալները:

Էդուարդ Աղայանի «Արդի հայերենի բացատրական բառարան»-ում «երկրպագել» բառի դիմաց կարդում ենք. երկիրը համբուրել մեկի առաջ՝ ի նշան խոնարհության և հարգանքի, իսկ կրոնական առումով՝ Աստծուն, սրբություններին հարգանք մատուցել՝ համբուրելով և խոնարհվելով:

Երկրպագությունը առ Աստված ոչ միայն Աստծուն հավատացողի պարտականությունն է, այլ նաև աստվածաշնչյան պատվեր է: Մկրտությունից հետո Հիսուս Քրիստոս Սուրբ Հոգու կողմից տարվեց անապատ՝ փորձվելու սատանայից: Փորձության ժամանակ, երբ չարը իրեն երկրպագելու դիմաց առաջարկեց աշխարհի բոլոր թագավորություններն ու դրանց փառքը, մեր Տերը պատասխանեց՝ Սուրբ Գրքից օրինակ բերելով. «Օրենքի գրքում գրված է. «Քո Տեր Աստծո՛ւն պիտի երկրպագես և Նրան միայն պաշտես» (Բ Օրենք 6.13):

Երկրպագում են գլուխը խոնարհելով կամ ծնրադրելով: Վերջինս կոչվում է նաև ծնրադիր երկրպագություն, որը հատուկ է հատկապես առանձնական աղոթքին և աստվածպաշտությանը: Կիրակի օրերը չեն ծնրադրում (նման կանոն առաջին անգամ ընդունվել է Նիկիայի Ա տիեզերական ժողովում), այլ՝ Աստծուն երկրպագում են կանգնած: Դրանով պատվում են կիրակի օրվա խորհուրդը, որովհետև այդ օրը Քրիստոս հարություն առավ և մարդկանց ոտքի կանգնեցրեց մեղքերից:

Երկրպագությամբ և գլուխ խոնարհեցնելով՝ ցույց ենք տալիս մեր ծառայությունն ու հեզությունը Աստծո առջև և խոստովանում մեր մեղավոր լինելը:

Կազմեց Կարինե Սուգիկյանը

 

 

 

24.10.14
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․