1 Մարտ, Բշ, Մեծ պահքի ԺԵ օր

Գրքեր

Հարության լուսավոր ուրախությունը Զորավոր Ս. Աստվածածին եկեղեցում

Ամեն տարի գարնանը, երբ ողջ բնությունը զարթոնք է ապրում, Հայ Առաքելական Սուրբ եկեղեցին տոնախմբում և փառաբանում է Աստվածորդու՝ Հիսուս Քրիստոսի Հարության հրաշքը: Ապրիլի 21-ին Զորավոր Ս. Աստվածածին եկեղեցում Զատկական տոնական Ս. Պատարագը մատուցեց եկեղեցու հոգևոր հովիվ Տեր Գրիգոր քահանա Գրիգորյանը: Հընթացս Ս. Պատարագի Տեր Վահան քահանա Առաքելյանն ընթերցեց Ն.Ս.Օ.Տ.Տ. Գարեգին Բ Ամենայն Հայոց Հայրապետի Սուրբ Հարության պատգամը: Եկեղեցին մարդաշատ լինելու պատճառով շատերը եկեղեցու բակում կանգնած էին Սուրբ Պատարագին ունկնդիր և մասնակից լինում: Ս. Պատարագի ավարտին խորանից վերստին հնչեց Հարության ավետիսը՝ «Քրիստոս Յարեաւ ի մեռելոց: Օրհնեալ է Յարութիւնն Քրիստոսի: Ձեզ և մեզ մեծ Աւետիս»: Ամեն տարի միշտ նույն ցնծությամբ ավետվող Հարության ավետիսը պատմական իրողություն լինելուց բացի, հայ քրիստոնյայի համար կենդանի ապրում է:

Եկեղեցու բակում Սուրբ Հարության ուրախարար ավետիսը կրկին անգամ ազդարարվեց Հայ Մարմնամարզական միության (ՀՄՄ) նվագախմբի խրոխտ հնչյունների ներքո: Գարնանային վերազարթոնքի գեղեցիկ շնչով հագեցած կյանքի հաղթանակի տոնը լուսավոր ուրախությամբ էր համակել միջոցառման մասնակիցներին, զի «յարեաւ Քրիստոս ի մեռելոց և մեզ զկեանս պարգևեաց»:

Զատկի տոնին ընդունված է եղել միմյանց շնորհավորելու հետ մեկտեղ օրհնել տալ ձվերը և դրանք մեկմեկու նվիրել, իսկ երեխաների համար ամենասպասված և սիրելի խաղերից մեկը ձվակռիվն է եղել: Զատկական համերգի ընթացքում Տեր Գրիգորը երեխաներին բաժանեց Սուրբ Զատկի՝ կյանքի և հարության խորհրդանիշը համարվող կարմիր ներկված ձվեր և խաչեր: Եվ երեխաներն անմիջապես անցան իրենց սիրելի խաղին, նրանք մեծ ուրախությամբ ձվակռիվ էին խաղում Տեր Գրիգորի և միմյանց հետ:

Սուրբ Հարության տոնը հայի համար հավատի, փրկության և կյանքի հաղթանակի տոնն է, որը միաժամանակ յուրաքանչյուր քրիստոնյայի համար իր ապրած կյանքի և նպատակի մասին խորհրդածելու լավագույն առիթ է: Քրիստոսի հաշափառ Հարությամբ «մահը կլանվեց, հաղթանակը նվաճվեց: Ո՞ւր է, մա՛հ քո հաղթանակը, ո՞ւր է, մա՛հ, քո խայթոցը» (Ա Կորնթ. 15:55):

 

Կարինե Սուգիկյան

21.04.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․