19 Մարտ, Գշ, Մեծ պահքի ԼԷ օր

Գրքեր

Մյուս ուղիներից տարբերվող ուխտավորի ուղին

Ուխտավորի ուղին քրիստոնյայի համար հնարավորություն է հոգեպես հարստանալու, վերանորոգվելու, վեր բարձրանալու առօրյա կյանքից և հոգսերից՝ մոտենալով այն սրբություններին, որ շաղախված են բազմադարյան աղոթքով: Մյուս ուղիներից տարբերվող այս ուղին անցնում է խոկման, աղոթքի և շարականների երգեցողությամբ: Եվ հենց այս ուղին՝ աղոթքի ճանապարհը, միասին անցնելու մեծ ցանկությամբ էլ հոկտեմբերի 11-ին Զորավոր Սուրբ Աստվածածին եկեղեցու համայնքը՝ այս անգամ թվով 75 ուխտավորներ խորհրդակատար Տեր Վահան քահանա Առաքելյանի առաջնորդությամբ ճանապարհ անցան դեպի Հայաստանի հյուսիս՝ Գուգարաց թեմի սրբավայրեր: Ուխտավորների մեջ էին նաև «Զորավոր» երիտասարդաց հոգևոր միության անդամները: Այս ընտանիքի յուրաքանչյուր անդամի համար ուխտագնացությունն իմաստավորվել էր տարբեր նպատակներով. Տիրոջը փառաբանել, մեղքերի թողություն խնդրել, հոգեպես զորանալ, հոգու և մարմնի առողջության արժանանալ կամ էլ որևէ խոստում կատարել:

Աղոթքի ճանապարհի մի մասն անցնելով՝ ուխտավորներն կանգ առան Կիրովականի 1931 թ-ին կառուցված Սբ. Աստվածածին եկեղեցում՝ մասնակցելու Սուրբ և Անմահ Պատարագին: Տիրոջ կենարար Մարմնի և Արյան ճաշակումով զորացած ուխտավորները շարունակեցին իրենց ուղին դեպի Դսեղ, որտեղ այցելեցին Սբ. Գրիգոր Լուսավորիչ եկեղեցի, եղան Հովհաննես Թումանյանի անվան տուն-թանգարանում: Ուխտավորին աղոթքի էր կոչում նաև Լոռվա հրաշք բնությունը:

Դսեղ գյուղի սարերից մեկի լանջին գտնվող Սբ. Քառասնից մանկանց խոնարհված սրբավայրը հասնելու համար ուխտավորները հաղթահարեցին քարքարոտ և դժվարանցելի ճանապարհը՝ իրենց մտքին և շուրթերին ունենալով սրբերի բարեխոսությունը: Այս սրբավայրում միասնական աղոթքից հետո Տեր Վահանը մաղթեց ուխտավորներին, որ Տերն ի կատար ածի բոլորի ուխտը. «Մենք այստեղ ենք, որովհետև այս եկեղեցու սրբությունը կանչում է մեզ, այն մեր մտքի և գիտակցության մեջ է: 12-րդ դարում կառուցված այս սրբավայրը մեզ հավատք և հույս է ներշնչում, սեր է արթնացնում մեր մեջ: Խաչքարերը և այս վայրում կառուցված եկեղեցին, որ թեև խոնարհվել է, խոսուն վկաներն են մեր պապերի հավատի, սիրո և նվիրումի: Այդ հավատքի կրողներն այսօր մենք ենք, որ խնդիր ունենք մեր հավատքի տաճարն ամուր պահելու, որպեսզի այն չքանդվի: Եվ հավատքի ամուր տաճարի շնորհիվ էլ վստահ լինենք, որ մի օր այս եկեղեցին կվերակառուցվի»:

Դսեղի Սբ. Գիրգոր Լուսավորիչ եկեղեցում երեկոյան ժամերգությանը մասնակցելուց հետո ուխտավորներն օրվա օրհնությամբ զորացած վերադարձան Երևան:

Յուրաքանչյուր ուխտագնացությամբ ուխտավորը, ով Աստծո պատկերն է կրում իր մեջ, ձգտում է հաղորդակցվելու այն աշխարհին, որ ռեալ գոյություն ունի թե՛ հավիտենության և թե՛ ֆիզիկական տարածության մեջ: Եվ Աստված, տեսնելով դեպի Իրեն ձգտելու մեծ ցանկությունը, ողորմում է, օրհնում և պահպանում զինվորյալ եկեղեցուն, հաղթանակած եկեղեցու՝ սրբերի բարեխոսությամբ:

 

 

Կարինե Սուգիկյան

15.10.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․