Քահանաներ Ծխական խորհուրդ Տիկնանց միություն Երիտասարդաց միություն Ցերեկային կենտրոն 
Քրիստոնյա ընտանիք Հարցազրույցներ Ուխտագնացություն Սոցիալական ծառայություն
«Զորավոր» երիտասարդաց և արանց միությունների ոտքով ուխտագնացությունը
Զորավոր Ս. Աստվածածին եկեղեցու «Զորավոր արանց» միությունն ավանդույթ է դարձրել ամեն տարի Ավագ շաբաթ օրը՝ Ս. Զատկի ճրագալույցին, ոտքով ուխտի մեկնել Ս. Էջմիածին: Հերթական ու սպասելի ուխտի ճանապարհն այս տարի «Զորավոր արանց» միությունն անցավ «Զորավոր» երիտասարդաց միության հետ միասին մարտի 30-ին: Մինչ ուխտի ճանապարհ անցնելը ուխտավորները վաղ առավոտյան Զորավոր Ս. Աստվածածին եկեղեցուն կից Ս. Անանիայի մատուռ-դամբարանում, հոգևոր հովիվ Տեր Գրիգոր քահանա Գրիգորյանի գլխավորությամբ, միասնական աղոթքի կանգնեցին, ապա Տեր Հոր օրհնությունն ստանալուց հետո շարժվեցին դեպի Հայոց հոգևոր կենտրոն: Մի քանի ժամ տևող ոտքի ճանապարհը նրանք հաղթահարեցին և իմաստավորեցին աղոթքներով: Ուխտավորների աղոթքի ուղին, որ ուղղված էր Հայոց աշխարհի խաղաղությանն ու անսասանությանը, կանգ առավ նախ առաջնորդանիստ Ս. Սարգիս և Փարաքարի Ս. Հարություն եկեղեցիներում, ապա իր շարունակությունն ունեցավ Ս. Հռիփսիմե, Ս. Գայանե և Ս. Շողակաթ եկեղեցիներում: Նրանց աղոթքի ուղին եզրափակվեց Զորավոր Ս. Աստվածածին եկեղեցում Ս. Զատկի ճրագալույցի Պատարագին մասնակցությամբ, որ առանձնանում էր իր հանդիսավորությամբ և հարության ուրախությամբ:
Հարության ավետիսն առավել զորացրեց աղոթքի ճանապարհ անցած ուխտավորներին, քանի որ Քրիստոսի հարությունը քրիստոնյայի հավատքի հիմքն է. Քրիստոս Իր քավչարար մահվամբ ու հարությամբ մեղքերի մեջ մոլորված մարդկության համար փրկության ուղի հարթեց և հավիտենական կյանք շնորհեց: Ուստի քրիստոնյաների համար Քրիստոսի հարությունը անսպառ ուրախության աղբյուր է:
«Վերհիշենք այն օրը, երբ Հիսուսի աշակերտներն իրենց Վարդապետի մահից հետո լիովին վհատված էին. Խաչյալի հետ նրանց լքել էին նաև հավատը, հույսը: Հիսուսի անշարժ, սառը Մարմինը, որ դրել էին Հովսեփ Արիամաթացուն պատկանող գերեզմանի մեջ, նրանց սրտի ճշգրիտ պատկերն էր: Թեպետ նրանք չարչարանքի վայրից հուսախափ փախչում էին, բայց հարության ցնցող և արթմնեցուցիչ լուրը՝ «Քրիստոս հարյավ»-ը, նրանց գոտեպնդում ու կենդանացնում է, ուրախացնում, ոգևորում ու այնպիսի ոգևորված գործունեության մղում, որին աշխարհի ամենաահեղ ուժերն անգամ անկարող են արգել լինել»,- ասել է եկեղեցու հայրերից Ղևոնդ վարդապետ Դուրյանը:
Կարինե Սուգիկյան
