ԱՀԹ «Ցերեկային կենտրոն»-ում անցկացվեց «Առողջություն» խորագիրը կրող դասընթաց

Ապրիլի 9-ին, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Հայկական Կարմիր խաչ ընկերության երիտասարդական բաժինը՝ Երիտասարդական Կարմիր Խաչը (ԵԿԽ), «Առողջ ապրելակերպ» ծրագրի շրջանակներում ԱՀԹ «Ցերեկային կենտրոն»-ի շահառուների երեխաների (4-11 տ.) համար անցկացրեց դասընթաց՝ առողջ և անառողջ սննդակարգի հետ կապված:

«Ցերեկային կենտրոն»-ի հոգևոր հովիվ Տեր Գրիգոր քահանա Գրիգորյանի գլխավորությամբ դասընթացը սկսվեց «Տերունական աղոթք»-ով: Այն վարում էին ԵԿԽ-ի աշխատակից Եսթեր Չոբանյանը և մի քանի կամավորներ: Դասընթացի համար ընտրված մի քանի խորագիրներից՝ «Առողջ սննդի հետևորդներ», «Առողջություն», «Առողջ հոգին՝ առողջ մարմնում», երեխաներն ընտրեցին «Առողջություն» խորագիրը:

Եսթեր Չոբանյանը դասընթացի առաջին բաժնում, անդրադառնալով առողջության սահմանմանը, նշեց, որ մեր առողջությունը մեր իսկ ձեռքերում է, քանի որ մարդու առողջության միայն 20%-ն է կախված ժառանգական գործոնից, 30%-ը՝ շրջակա միջավայրից, իսկ 50%-ը՝ ապրելակերպից: Առողջ սննդակարգի հետ կապված երեխաներն առավել մանրամասնորեն ծանոթացան սննդի հինգ բաղադրատարրերին և դրանց ճիշտ չափաբաժնի գործածմանը:

Դասընթացի երկրորդ բաժնում ԵԿԽ-ի աշխատակիցը երեխաներին ներկայացրեց սննդի դասակարգման բուրգը, որ ներկայացնում էր օրվա համար անհրաժեշտ առողջ սննդակարգը: Երեխաների համար «սիրելի» համարվող ֆասթֆուդը, չիպսերը, տապական և գազավորված ըմպելիքներն անառողջ սննդակարգի շարքում հայտնվեցին:

Դասընթացին հարց ու պատասխանով քննարկվեցին, թե օրը քանի՞ անգամ պետք է սնվել, ո՞ր հյութերն են ավելի օգտակար, ե՞րբ և որքա՞ն ջուր խմել, մաստակը ե՞րբ և որքա՞ն ծամել:

Այնուհետև կամավորները երեխաներին ներկայացրեցին խնձորի, բանանի, գազարի և բազուկի կարևորությունները: Երեխաների համար պարզ դարձավ, որ իրենք պետք է սնվեն օրը չորս անգամ, խմեն ավելի շատ բնական հյութեր, ուտելիս ջուր չխմեն և այլ օգտակար տեղեկություններ՝ առողջ սննդակարգի հետ կապված:

Դասընթացի ավարտին ԵԿԽ-ի կամավորները խաղեր կազմակերպեցին երեխաների համար, ովքեր տուն վերադարձան՝ առողջ ապրելակերպի մասին հսկայական պաշար կուտակած: Տեր Գրիգորը շնորհակալություն հայտնեց Հայկական Կարմիր խաչ ընկերության երիտասարդական բաժնին՝ կարևոր և օգտաշատ դասընթացի կազմակերպման համար:

Կարինե Սուգիկյան