19 Նոյեմբեր, Գշ, Հիսնակաց պահքի Բ օր

Գրքեր

Ամենագլխավոր ընտրությունը

Երկրորդ Համաշխարհայինի տարիներին գերմանացիների գրաված Արևմտյան Եվրոպայի երկրներից մեկում մի կիրակի լյութերականները հավաքվել էին իրենց եկեղեցում: Պատարագի ժամանակ հանկարծ մի քանի հարբած էսէսականներ մտան եկեղեցի: Նրանցից մեկը կրակեց առաստաղին և ընդհատեց պատարագը: Քանի որ լյութերականները չեն ընդունում սրբապատկերները, նրանց եկեղեցիներում պատկերներ չկան: Սակայն այդ եկեղեցու պատին Փրկչի պատկերով մի նկար էր փակցված:

Որոշելով զվարճանալ, էսէսականներից մեկը պոկեց պատից նկարն ու նետեց հատակին:

- Լսե՛ք, քրիստոնյանե՛ր, այժմ բոլորդ դուրս կգաք եկեղեցուց, սակայն մինչ այդ ձեզնից յուրաքանչյուրը կմոտենա այս պատկերին և կթքի Քրիստոսի վրա: Ով չթքի՝ փամփուշտ կստանա ճակատին:

Ատրճանակի փողի դիմաց կանգնած մարդիկ մտածում էին. «Մենք բողոքականներ ենք և համարում ենք, որ Աստծու պատկերները կուռքեր են, որոնք պարտավոր չենք պաշտել: Բայց մյուս կողմից՝ ախր Քրիստոսն է այնտեղ պատկերված և դրանից ոչ մի տեղ չես փախչի: Եկեղեցում էլ հավաքվել ենք Նրան աղոթելու համար: Դեռ մի րոպե առաջ Նրա ողորմածությունն էինք խնդրում և վստահեցնում, որ անսահման սիրում ենք Նրան և երախտապարտ ենք: Իսկ այժմ ողջ մնալու համար պիտի թքենք Նրա վրա, Ում քիչ առաջ այդքան սիրում էինք»:

Սակայն ատրճանակը խիստ ծանրակշիռ պատճառ էր, որպեսզի այնուամենայնիվ թքեին: Եվ նրանք գնացին: Անցնում էին ու թքում Քրիստոսի պատկերին:

Այն առավոտ աղոթողների մեջ տասներկուամյա մի աղջնակ կար: Երբ նրա հերթը հասավ, նա ծնկի իջավ, զգուշորեն սրբեց թքածներն ու համբուրեց Քրիստոսի պատկերը: Նույն վայրկյանին էսէսականը կրակեց, և աղջիկը՝ պատկերն իր արյամբ ներկելով, մնաց եկեղեցու հատակին պառկած:

Դրանից հետո էսէսականներն արագ հեռացան: Իսկ եկեղեցում մնացին մեծահասակները, որ ազատվել էին իրենց կյանքի ամենագլխավոր ընտրությունը կատարելու անհրաժեշտությունից:

Իսկ ի՞նչ կպատահի, եթե մի օր հանկարծ թշնամին մեր եկեղեցի մտնի պատարագի ժամանակ և դրանից ողջ դուրս գալու այդ միակ պայմանը դնի: Ինչպե՞ս կվարվենք: Այդ հիմա կարող ենք քաջ ձևանալ և կուրծք ծեծել, իսկ իրականում ինչպե՞ս կվարվենք: Միգուցե առաջինը հենց դու թքես: Եվ քանի դեռ ինքդ ծնկի չես իջել ատրճանակի փողի առջև, և չես սրբել ուրիշների թուքը, չհամարձակվես դատել նրանց, որոնք այն օրը եկեղեցում էին:

 

Ռուսերենից թարգմանեց Էմիլիա Ապիցարյանը

24.06.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․