1 Մարտ, Բշ, Մեծ պահքի ԺԵ օր

Գրքեր

«Արթո՛ւն մնացեք և աղո՛թք արեք»

«Արթուն կացէք և աղօթս արարէք»:

«Արթո՛ւն մնացեք և աղո՛թք արեք» (Մատթեոս 26:41):

Սիրելի՛ քույրեր և եղբայրներ ի Հիսուս Քրիստոս.

Այսօր Հայ Առաքելական Սուրբ Եկեղեցու տոնացույցով նշվում է «Հղություն Սուրբ Աստվածածնի Աննայից» տոնը, որն ուրախության և հուսադրության մեծ օր է և առիթ: Հուսադրության, որովհետև, ինչպես գիտենք, Սուրբ Մարիամ Աստվածածնի ծնողները՝ Աննան և Հովակիմը, երկար ժամանակ երեխա չէին ունենում և Աստծուն աղոթում էին որդեծնության համար: Եվ Աստված իր ժամանակին նրանց զավակ է պարգևում, որը մեծագույն սուրբ և մարդկության բարեխոս Մարիամ Աստվածածինն է: Այս տոնը բերկրալից տոն է, որովհետև ազդարարում և փաստում է, որ աղոթքը պսակվեց իր հրաշալի արդյունքով: Սուրբ Աննայի և Հովակիմի աղոթքները լսելի եղան: Այս իրողությունը ճշմարիտ հավատքի մի վկայություն է, որ նրանք հույսը չկտրեցին ո՛չ Աստծուն դիմելուց, ո՛չ հարատև աղոթքից, չհուսահատվեցին, չնեղացան Աստծուց, չխռովվեցին ու չվրդովվեցին: Այս տոնը մեզ սովորեցնում է նաև չնայել միայն խավարի թանձրությանը և դրանով իսկ հանձնվել, հուսահատվել, մոռանալ Լույսի գոյության և զորության մասին, չարից սարսափել և չտեսնել Ամենակարող Աստծու օգնականությունը Նրան փնտրողների կյանքում ու թիկունքին: Այո՛, աշխարհը խավարի գույներ ունի, ժամանակները չար են, բայց մեր Տեր և Փրկիչ Հիսուս Քրիստոս մեզ պատգամեց աղոթել և պաշտպանիչ զրահ ունենալ. «Արթո՛ւն մնացեք և աղո՛թք արեք, որպեսզի փորձության մեջ չընկնեք» (Մատթեոս 26:41):

Խավարի մեջ անչափ դժվար է դիմանալ, համբերել, հույսը չկորցնել, սպասել լուսաբացին և ընդհանրապես լույս ակնկալել: Այդ ժամանակ չարը կարող է մեզ թվալ հաղթական, աննահանջ, իր գոյությունը պահպանել տևական ժամանակ, բայց հենց այդ ժամանակ է, որ չպետք է մոռանալ աղոթքը, որպեսզի շուտափույթ բացվի լույսը, և այգաբացը չուշանա: Աղոթքն է այդ մութը ցրողը: Առանց աղոթքի բուժարար ազդեցության՝ դժվար է վերականգնվել, ապաքինվել, հուսադրվել, որովհետև այս աշխարհում և կյանքում մեզանից և մեր ուժերից վեր բազում չար ու խավարային իրողություններ կան, որոնք միայն աղոթքի զորությամբ են հաղթահարվում ու չքանում: Որովհետև մարդ կարող է նայել իր շուրջը եղած խավարին ու սարսափել, վախենալ, հենարաններ փնտրել ու չգտնել, օգնություն ակնկալել տարբեր տեղերից և չստանալ, բայց աղոթքը այն հրաշագործ ուժն է, որ նախ և առաջ մարդու հոգու ներսում գոտեպնդում է նրան, զորություն հաղորդում և ապա երկինքը իր ողջ զորությամբ մոտեցնում իրեն, մոտեցնում երկրին: Երբեմն մարդ կարող է աշխարհի արհավիրքներից, աղետներից, պատերազմներից, հիվանդություններից, փոթորկալից իրադարձություններից փոքրիկ երեխայի նման սարսափել և թաքնվելու անկյուն փնտրել: Եվ հենց այդ պահին է, որ աղոթքը օգնության է գալիս մարդուն և օգնության բերում Սուրբ Հոգու շնորհները՝ խաղաղությունը, անդորրը, վստահությունը, համբերությունը, մխիթարությունը, լույսն ու ապրելու ուժը և նրա ոտքերի տակ հողը դարձնում է անսասան: Պատահական չէ, որ մեր ժողովուրդը մահվան պարագայում սգավորներին մխիթարում է «Սուրբ Հոգով մխիթարվեք» խոսքով, քանի որ տվյալ պահին այլևս ոչ ոք ի զորու չէ մխիթարություն պարգևել վշտակիրներին:

Շատ հաճախ մարդիկ, նայելով խավարին ու մթությանը, նույնիսկ չեն ուզում նայել Լույսին, որ նրանց համար պիտի գա աղոթքով ու Սուրբ Պատարագի շնորհներով: Շատ-շատերն ապրում են աշխարհի օրենքներով, աշխարհի օրենքներով տխրում և ուրախանում են, սակայն նույնիսկ դժվարությունների, դժբախտությունների ու նեղությունների ժամանակ չեն ցանկանում նայել Աստծու Լույսին, հիշել Աստծուն, խնդրել Աստծու ամենահաս փրկությունը: Նրանք նախընտրում են ինքնակամ ելքեր փնտրել, բայց չդիմել Աստծու Ամենակարող Աջի զորությանը, աղոթք չանել, չմտնել հոգևոր կյանքի մեջ և հոգում ցնծություն չզգալ: Առակաց գրքում ասվում է. «Ով փնտրում է Տիրոջը, նա գիտություն կգտնի՝ արդարությամբ հանդերձ, և ովքեր ուղիղ սրտով փնտրեն Նրան, խաղաղություն կգտնեն» (Առակներ 16:6), այսինքն՝ ամեն-ամեն ինչ իր տեղը կընկնի և կկարգավորվի: «Լույսը եկավ աշխարհ, սակայն մարդիկ խավարն ավելի սիրեցին, քան լույսը», – ասվում է Հովհաննու Ավետարանում (Հովհաննես 3:19): Ովքեր չեն գալիս դեպի լույսը, իրենք են կորցնում, քանի որ աղոթքն առ Աստված անհնարինը դարձնում է հնարավոր, բացում է փակուղիները, անելանելի իրավիճակներից ելքեր ցույց տալիս և հրաշքներ կատարում: Քրիստոնեության այս լույսի մեջ, երբ մարդ նախընտրում է անաստվածությունը, անհավատ և աթեիստ լինելը, կորցնողը ինքն է, որ շարունակաբար պիտի խճճվի աշխարհի ու կյանքի բարդ թնջուկի մեջ, մոլորվի ու խորանա անհայտության ու անորոշության լաբիրինթոսում և չցանկանա Աստծու Լույսի ճրագով դուրս գալ այդ ամենից: Այսպիսի մարդիկ համառորեն գերադասում են անհավատությունն ու նրա խավարը, քան ճշմարիտ հավատքն առ Հիսուս Քրիստոս և Նրա պատվիրանների բերած կանոնավորությունը, խաղաղությունը, կարգավորությունը, սերն ու նրա ծնունդ տված բարիքը, խարդախություններից ու նենգություններից հեռու կյանքը: «Ով Իմ ետևից է գալիս, խավարի միջով չի քայլի, այլ կընդունի կենաց լույսը», – ասում է Հիսուս Քրիստոս (Հովհաննես 8:12):

Սիրելինե՛ր, Սուրբ Աստվածամորը նվիրված այս տոնի ոգեկոչումը`հույսի և ապագայի հանդեպ լավատեսություն ունենալու առիթ է յուրաքանչյուր քրիստոնեայի համար: Այս օրերին, երբ մեր ժողովրդի զավակները ընկճված են և անգամ հուսախաբված, լույսի և հույսի շողեր են փնտրում սեփական հայրենիքի ապագայի հարցում: Այո՛, դժվար է ու ծանր, բայց ոչինչ թող հոգեկործան չլինի մեզ համար, որովհետև Երկնավոր Հայրը մեզ հետ է և մեզ չի լքել: Մենք շարունակում ենք Նրա որդիները լինել: Քրիստոս Իր աշակերտներին ասում է. «Այս բաները ասացի ձեզ, որպեսզի Ինձնով խաղաղություն ունենաք: Այստեղ, աշխարհում նեղություն պիտի ունենաք, սակայն քաջալերվեցե՛ք, որովհետև Ես հաղթեցի աշխարհին» (Հովհաննես 16:33): Մեզ մնում է հաստատուն մնալ մեր հավատքի մեջ, շարունակել աղոթել, չհուսահատվել, մեր սրբերի բարեխոսությունը խնդրել հայ ազգի ու եկեղեցու, հայոց պետության ու Արցախ աշխարհի անսասանության և խաղաղության համար և սպասել Աստծու փրկությանը, որովհետև մենք ինչ-որ չափով որոշ քայլեր ձեռնարկեցինք մեր հայրենիքի համար, այժմ ուղղակի պետք է սպասենք Տիրոջը: Մենք հավատում ենք Աստծու այգաբացին: Երբ մոմ ենք վառում եկեղեցիներում, մոմի լույսը տեսնում ենք, այդպիսի լույս ենք ակնկալում տեսնել նաև մեր կյանքում, որ խավարը ցրվի, մութը հեռանա, դևը հալածվի: Մեր աղոթքն էլ այդ մոմի լույսն է, որ լուսաբացի հույս է սփռում մեր հոգիներում: Խավարի մեջ էլ հավատացե՛ք Լույսի գոյությանը և մի՛ վախեցեք:

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

 

Տեր Վահան քհն. Առաքելյան

 

09.12.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․