Գրքեր

Ասեղնագործությունը

Երբ փոքր էի, մայրս շատ էր ասեղնագործում: Ես նստում էի նրա կողքի փոքր աթոռին ու հարցնում, թե ինչ է անում: Մայրս պատասխանում էր. «Ասեղնագործում եմ»:

Քանի որ փոքր էի, մայրիկիս աշխատանքը միայն ներքևից էի տեսնում: Միշտ բողոքում էի, որ միայն խճճված ու տգեղ թելեր եմ տեսնում:

Նա ժպտում էր ինձ վերից ու քնքշորեն ասում. «Գնա՛ խաղալու, տղա՛ս, երբ ավարտեմ, ասեղնագործությունը ծնկներիս կդնեմ ու դու վերևից կնայես»:

Ես ինձ հարց էի տալիս, թե ինչու է ասեղնագործությունն այդքան տգեղ ու խճճված երևում ինձ և ընդհանրապես՝ այդ մուգ թելերը մայրիկի ինչին են պետք: Սակայն, հետո մայրիկը կանչում էր ինձ. «Ե՛կ, որդի՛ս, արդեն կարող ես նայել»: Ուրախ-ուրախ ներս էի վազում ու անչափ զարմանում, թե որքա՜ն գեղեցիկ է ասեղնագործությունը երեսի կողմից: Մայրիկը գեղեցիկ ծաղիկ էր ցույց տալիս կամ հիասքանչ մայրամուտ, և ես չէի կարողանում աչքերիս հավատալ՝ ներքևից թելերի տհաճ կույտ էր, վերևից՝ նման գեղեցկություն: Մայրս այնժամ ասում էր. «Տղա՛ս, ներքևից ամեն ինչ խառն ու խճճված է թվում, բայց դու չգիտեիր, որ ես այնտեղ՝ վերևում իմ պլանն ունեի, իմ գեղեցիկ պատկերը: Այժմ վերևից նայիր, թե ինչ գեղեցիկ է»:

Այդպես էլ կյանքում է: Աստվածային նախախնամության մասին չիմանալով, մտածում ենք, որ ամեն ինչ վատ է, այնպես չի ընթանում, ինչպես անհրաժեշտ է: Իսկ իրականում այն ամենն, ինչ կատարվում է՝ աստվածային ասեղնագործության մի մասն է: Վերևից ավելի լավ է երևում, թե ինչպես է պետք գեղեցիկ նախշ ասեղնագործել:

 

Ռուսերենից թարգմանությունը՝ Էմիլիա Ապիցարյանի

15.11.23
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․