31 Մարտ, ԳՇ, Մեծ Պահքի ԼԷ օր

Գրքեր

Այս տարվա առաջին աղոթքը Երկրորդ Երուսաղեմում

Մարտի 26-ին Զորավոր Ս. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, մեկնեց ուխտագնացության Վայոց Ձորի սրբավայրեր: Զորավոր Ս. Աստվածածին եկեղեցուն կից Ս. Անանիայի մատուռ-դամբարանում միասնական աղոթքից հետո թվով քառասուն ուխտավորներն անցան այս տարվա իրենց առաջին աղոթքի ուղին, որ համահունչ էր օրվա՝ Մեծ պահքի հինգերորդ՝ Դատավորի կիրակիի խորհրդին, թե անհրաժեշտ է հարատև, ամեն ժամ և անձանձրույթ աղոթել:

«Մեծ պահքի ընթացքում մեր ուխտի ճանապարհը հավատի մեջ առավել ամրանալու և զորանալու կարևոր նպատակ է հետապնդում, որպեսզի մեր հոգևոր էության վերականգնումով հաղթականորեն հասնենք ուրախալի ու հաղթանակած օրվան, քրիստոնեության գլխավոր տոնին՝ Ս. Հարությանը: Օրն այս հրաշալի մի առիթ է խորհելու ու լիովին գիտակցելու, որ մենք բոլորս Քրիստոսի Մարմնի մի մասն ենք և որ Աստծո սիրո մեջ աճելու համար անհրաժեշտ է աղոթական կյանքով ապրել, որպեսզի Տերը լուսավորի մեր սրտերը, ուժ ու կարողություն տա, որ ուրիշների կյանքերում ևս Աստծո ներկայությունը զգալի դարձնենք»,- ասաց Տեր Գրիգորը:

Առաջին սրբավայրում՝ Եղեգնաձորի Ս. Աստվածածին (Ս. Սարգիս) եկեղեցում (կառուցման թվականը հայտնի չէ, վերակառուցվել է 1878 թ.), ուխտավորները մասնակցեցին Սուրբ և Անմահ Պատարագի՝ Եղեգնաձորի տարածաշրջանի հոգևոր հովիվ Տեր Վազգեն քահանա Հովհաննիսյանի մատուցմամբ: Տեր Հայրը քարոզին մասնավորաբար հորդորեց, որ, Դատավորի կիրակիի խորհրդին անսալով, անհրաժեշտ է հարատև աղոթել հանուն Քրիստոսի կամքի, հանուն սիրո, խաղաղության ու մեր երկրի բարօրության և Երկնքի Արքայությունը մեր սրտում ունենալով՝ ապրել՝ հուսալով ի Տեր:

Սիրո ճաշից հետո Զորավոր Ս. Աստվածածին եկեղեցու համայնքը, Տեր Վազգեն քահանայի ուղեկցությամբ, շարունակեց իր ուխտի ուղին՝ մեկնելով սրբավայրերով հարուստ Մարտիրոս գյուղը: Գյուղի Ս. Աստվածածին եկեղեցու (13-րդ դ.) մուտքի դռան վերևի մասում մեծ տառերով փորագրված էր՝ «Յիսուս Քրիստոսի Ս. Վկայարան Երկրորդ Երուսաղեմ»: Այս եկեղեցում է պահպանվում Երուսաղեմի Ս. Հարություն տաճարից բերված քարը, Ս. Հակոբ Մծբնա հայրապետի գանգը և մարտիրոսված հերոսների աճյունները: Սրբավայրում ուխտավորները մասնակցեցին Խաղաղական ժամերգությանը, ապա իրենց խոնարհումը բերեցին սրբությունների առջև:

«Երկրորդ Երուսաղեմ կոչվող այս սրբավայրում այս տարվա առաջին աղոթքը հնչեց ձեր շուրթերից: Կարևոր է, որ մեր սրբավայրերն ուխտավորներ ունենան: Եթե նկատեցիք սրբապատկերները մինչ մեր աղոթքը տխուր էին, իսկ միասնական աղոթքից հետո կարծես զվարթացան»,- ուրախությամբ ասաց Տեր Վազգենն ուխտավորներին:

Երրորդ սրբավայրը, որ ուրախությամբ սպասում էր իր ուխտավորներին, Մալիշկայի Ս. Աննան էր (2000 թ.), ուր ուխտավորները Երեկոյան ժամերգությամբ ընդհանրական աղոթք ունեցան: Զորավոր Ս. Աստվածածին եկեղեցու համայնքը և Տեր Վազգենը փոխադարձաբար շնորհակալություն հայտնեցին միմյանց՝ ուխտի աղոթական օրը միասնաբար անցկացնելու համար:

Ուխտավորների աղոթքները՝ որպես մեկ աղոթք դարձած, հայցում էր Ամենակալից՝ «Ուղիղ եղիցին աղօթք մեր որպէս խունկ առաջի քո, Տէր»: Ուխտի օրն ուխտավորների հոգում ամրագրեց աղոթքի մեջ հարատևելու գիտակցությունը և հաստատակամությունը՝ Տիրոջով զորացած անցնելու պահեցողության ընթացքը և արժանանալու Ս. Հարության լուսավոր բերկրանքին:

 

Կարինե Սուգիկյան

26.03.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․