«Երեխաները մաքուր են, անբասիր, այդ պատճառով Աստված լսում է նրանց աղոթքը»

  Հունիսի 25-ին Զորավոր Ս. Աստվածածին եկեղեցու «Զորավոր» կիրակնօրյա դպրոցը, ԱՀԹ առաջնորդական փոխանորդ Գերաշնորհ Տեր Նավասարդ արք. Կճոյանի օրհնությամբ և մանկավարժ Տաթևիկ Պետրոսյանի առաջնորդությամբ, ուխտագնացության մեկնեց Կոտայքի թեմի սրբավայրեր:

Առաջին սրբավայրը, ուր փոքրիկ ուխտավորները Հայոց ազգի համար միասնաբար աղոթեցին և «Տերունական աղոթք»-ը երգեցին, Հատիս լեռան ստորոտին գտնվող Ակունքի Սուրբ Պողոս-Պետրոս եկեղեցիներն էին (5-7-րդ դ.): Միասնական աղոթքից հետո երեխաները համախմբվեցին սիրո ճաշի շուրջ, այնուհետև մանկավարժը երեխաներին ծանոթացրեց սբ. Պողոս և սբ. Պետրոս առաքյալների վարքերը: Հոգեշահ զրույցն ընթացավ հարց ու պատասխանով: Զրույցին մասնակից դարձան նաև կիրակնօրյա դպրոցի սաների ծնողները:

Հաջորդ սրբավայրը, որ հյուրընկալեց «Զորավոր» կիրակնօրյա դպրոցի սաներին, Նոր Գյուղի Ս. Աստվածածին եկեղեցին էր, ուր երեխաները կրկին անգամ համախմբվեցին միասնական աղոթքի շուրջ: Եկեղեցու հայրերը նշում են, որ երեխաների աղոթքները կարող են հրաշքներ իրագործել: Աստված տալիս է նրանց այն, ինչ նրանք խնդրում են Նրանից: Չէ որ երեխաները մաքուր են, անբասիր, և այդ պատճառով Աստված լսում է նրանց մաքուր աղոթքը:

Իսկ երեխաների հոգևոր-բարոյական դաստիարակության մեջ իրենց մեծ նպաստն են բերում Հայաստանյաց եկեղեցուն կից գործող կիրակնօրյա դպրոցները: Կիրակնօրյա դպրոցի հիմնական խնդիրը երեխաների մեջ սեր սերմանել դեպի Արարիչը և մարդիկ, դեպի եկեղեցին և հայրենիքը: Այն բարոյական արժեքները, որ փոխանցում է դպրոցը երեխաներին, պահպանվում է նրանց ողջ կյանքի ընթացքում: Երեխաները՝ որպես քրիստոնյաներ և երկրի օրինակելի քաղաքացիներ, հոգևոր և բարոյական հենարան են դառնում շատ մարդկանց համար՝ այդ կերպ լիարժեք երջանկություն ձեռք բերելով կյանքի երկրային ճանապարհին: Հոգևոր բարոյական դաստիարակությունն օգնում է երեխային բացահայտել մարդու առաքելությունը երկրի վրա, այն յուրահատուկ մի դպրոց է, որ նախապատրաստում է մարդուն անմահ կյանքին Աստվածային սիրո Արքայությունում: Մարդն ապրում է հավերժ ապրելու համար, իսկ առանց անմահության կյանքը կորցնում է իր իմաստը:

Կարինե Սուգիկյան