22 Հունվար, Բշ, Առաջավորաց պահքի Ա օր

Գրքեր

Համայնքն աջակից եղավ փոքրիկ Էմանուելին

Դեկտեմբերի 23-ին Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, աջակից եղավ Սարգսյան բազմազավակ ընտանիքին: Հոգևոր հովիվ Տեր Գրիգոր քահանա Գրիգորյանը ընտանիքի զավակին՝ 2.5-ամյա Էմանուելին, և նրա մորը՝ Մարիամ Ղազարյանին (36 տ.), տեղափոխեց Սուրբ Աստվածածին բժշկական կենտրոն, որպեսզի երեխան անցնի ԷԷԳ (էլեկտրոէնցեֆալոգրաֆիա) հետազոտությունը: Վեց անչափահաս զավակների մայրը նշեց, որ իր փոքրիկն ութ ամսեկանից առ այսօր տասը ցնցումների մեջ է ընկնել: «Երեխաս անցել է մագնիսառեզոնանսային տոմոգրաֆիա (MTR, յամեր), բայց հերթական հետազոտության համար չունեինք անհրաժեշտ գումարը: Ըստ տոմոգրաֆիայի արդյունքի՝ երեխայիս մոտ ցնցումների պատճառով ուղեղի ձախ կիսագնդի սնուցումը վատացել է: Շնորհակալ եմ Տեր Գրիգորից, ով անմիջապես արձագանքեց խնդրանքիս և աջակից եղավ մեր ընտանիքին»,- ասաց Մարիամը:

Սարգսյան ընտանիքը բնակվում է Շերամի 87/28 հասցեում: Ընտանիքի հայրը պայմանագրային զինծառայող է և աշխատում է ՀՀ ՊՆ մարշալ Ա. Խանփերյանցի անվան ռազմական ավիացիոն ինստիտուտում: Սոցիալապես անապահով ընտանիքն իր նվազագույն կարիքները փորձում է հոգալ ընտանեկան նպաստի և ընտանիքի հոր աշխատավարձի գումարներով:

Տեր Գրիգորը Մարիամ Ղազարյանին հանձնեց դրամական օգնություն (40 000 դրամ), որը ինչպես և բուժստուգման գումարը տրամադրել էր Զորավոր Ս. Աստվածածին եկեղեցու խաչքավոր Գեղամ Ղուկասյանը:

«Բացի սեփական կամքից, ոչ մի ուրիշ բան չի կարող մարդուն ետ պահել ողորմություն տալուց՝ ո՛չ ժամանակը, ո՛չ չքավորությունը, ո՛չ այլ խանգարող հանգամանք: Եթե ոսկի չունես ողորմելու, սակայն ձեռքեր ունես, որոնցով կարող ես կարոտյալներին օգնել, հաց չունես, որպեսզի աղքատին կերակրես, սակայն լեզու ունես, որով Կենաց Հացը կարող ես տալ և հասարակության օգուտի համար աղոթք կարող ես մատուցել: Հիվանդին դարմանելու կարողություն չունես, սակայն ոչ մի բան քեզ չի արգելում հիվանդատես գնալ: Բանտարկյալին ազատելու կարողություն չունես, սակայն ոտք ունես՝ նրա մոտ գնալու և նրան տեսնելու, քաջալերելու, մխիթարելու և նրան ցավակցելու, հառաչելու և Աստծուն աղաչելու, վշտակից լինելու նրա վշտերին և արձակիչ՝ կապանքներին» (Սարգիս Շնորհալի):

 

 

Կարինե Սուգիկյան

23.12.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․