Գրքեր

Մա՞րդ, թե՞ ռոբոտ

Մի ամբարտավան մարդ, որ զբաղվում էր ռոբոտաշինությամբ ու ծաղրանքով էր վերաբերվում հավատքին, հիվանդանում է: Եվ նրա բարեկամները նրան բերում են ծեր վանականի մոտ և ասում.

- Հա´յր սուրբ, խնդրում ենք օգնիր այս մարդուն. չի կարողանում խոսել, լեզուն փակվել, պապանձվել, համրացել է և այդ վիճակից տանջվում ու տառապում է:

Ծեր վանականն Աստծո շնորհի միջոցով հասկանում է, թե ինչ է եղել և նայելով ամբարտավան մարդուն՝ պատասխանում է.

- Չէ՞ որ ինքդ ծաղրում էիր, հոխորտում, թե ինչո՞ւ այսքան չարություն և անարդարություն կա այս աշխարհում, եթե Աստված գոյություն ունի և բարի է: Աստծուն մեղադրում էիր և նրանից պատասխան պահանջում: Արդ, Աստված էլ լսեց և ցույց տվեց, թե ինչ կլինի, եթե ազատությունդ և ինքնիշխանությունդ սահմանափակվի ու լեզուդ փակվեց, որպեսզի այլևս չխոսես այն, ինչ ուզում ես, հատկապես՝ չար ու վատ խոսքեր:

Աստված Սեր է և չի կամենում բռնանալ մարդու ազատության վրա, նրան ռոբոտ դարձնել, այլ թույլ է տալիս, որ մարդն ինքնիշխան լինի, տեսնի, թե առանց Աստծու ինչպիսի կյանք է ստեղծում և ինչպիսի կյանքի ավարտ է ունենում... որպեսզի ապաշխարությամբ և ազատ կամքով վերադառնա դեպի Երկնավոր Հայրը: Հետևաբար, ապաշխարի´ր, որ լեզուդ կրկին բացվի և Աստծուն փառաբանիր, որ քեզ ռոբոտ չի ստեղծել, այլ մարդ է ստեղծել, որ մտածում, խոսում և գործում է այն, ինչ ուզում է:

 

Հովհաննես սրկ. Մանուկյան

05.06.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․