Մարդը կոչված է արարելու և բարին գործելու | Mardy Kochvats E Ararelu Ev Barin Gortselu



Գրքեր

Մարդը կոչված է արարելու և բարին գործելու

Հունիսի 13-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Ավետիսյան Արմենին (40 տ.) հանձնեց դրամական օգնություն (50 000 դրամ), որ տրամադրել էր ֆրանսիայում բնակվող Քրիստինե Բաղդասարյանը: Արմենն իր կնոջ և դստեր հետ բնակվում է Գյումրի քաղաքի Անի թաղամասի 7 փ. 4/18 հասցեում: Տան միակ զավակը՝ Ավետիսյան Քնարիկը (8 տ.), լույս աշխարհ է եկել մանկական ուղեղային կաթվածով (ԴՑՊ): Ընտանիքի հայրը նշեց, որ Քնարիկը տեսողության և տեղաշարժման հետ կապված խնդիրներ ունի, նրա ձախ աչքի տեսողությունն աննշան է, իսկ հասակ առնելուն զուգահեռ ոտքերի ջլերը կարճանում են: «Աղջիկս տեսողության հետ կապված որոշ բուժումներ անցավ, իսկ տեղաշարժման հետ կապված բժիշկները մինչ չափահասության տարիք բացառում են վիրահատությունը՝ առաջարկելով միայն վեց ամիսը մեկ բոտոքս անցնել: Փառք Աստծո, որ աղջիկս մտային խնդիր չունի»,- ասաց Արմենը:

Ավետիսյան ընտանիքը ֆինանսական դժվարությունների և պարտքերի առջև է կանգնել. ընտանիքի հայրը մեկ տարուց ավել է, որ առողջական լուրջ խնդիրների պատճառով ի վիճակի չէ աշխատել: Ինչպես նշեց Արմենը, կինը նույնպես առողջական խնդիրներ ունի և չի կարող աշխատել, իսկ ընտանեկան նպաստի և Քնարիկին հատկացվող հաշմանդամության գումարներով չեն կարողանում հոգալ անգամ երեխայի վերականգնողական բուժման համար անհրաժեշտ նվազագույն ծախսերը: Ընտանիքի համար մեծ մտահոգություն է այն հանգամանքը, որ վերջին շրջանում Քնարիկի բուժումները հիմնականում պետպատվերով չեն:

«Ի տարբերություն նախորդ տարիների՝ այս տարի երեխայի օրթեզավորումը վճարովի էր, ինչի գումարը մեծ դժվարությամբ կարողացանք հայթաթել: Աշխատելու մասին դեռ չեմ կարող մտածել, քանի որ չեմ կարողանում համապատասխան բուժումներն անցնել: Շատ հաճախ դիմում ենք բարի մարդկանց օգնությանը, շնորհակալ եմ Տեր Գրիգորին և աջակից անձին՝ օգնության ձեռք մեկնելու համար»,- ասաց ընտանիքի հայրը:

Բոլորիս հայտնի է աստվածաշնչյան հետևյալ համարը. «Մարդ ինչ սերմանում է, այն էլ կհնձի» (Գաղատ. 6:8), և ի՞նչ պետք է հնձի այն մարդը, որ ոչինչ չի սերմանել: Այսինքն՝ քրիստոնյայի առաքելությունը ոչ թե միայն չարը չգործելն է, այլ՝ հավատը կենդանի պահելը բարի գործերով (Հակոբ. 2:26): Մարդը կոչված է արարելու և բարին գործելու: Աստված մարդուն տարբեր շնորհներ է տվել, որ պետք է գործածի ի բարին: Այս օրինակը Քրիստոս ներկայացրեց «Քանքարներ» առակում (Մատթ. 25:14-30): Տերը բարկացավ այն ծառայի վրա, ով ստացած քանքարը թաքցրել էր հողի մեջ: Նա իր ստացած քանքարը ո՛չ շահարկության մեջ էր դրել և ո՛չ էլ կորցրել էր, այսինքն՝ ո՛չ չարիք էր գործել և ո՛չ էլ բարիք:

 

Կարինե Սուգիկյան

13.06.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․