Գրքեր

Օգնության ձեռք մեկնիր

Առավոտից անձրևը չէր դադարում, և ավտոբուսի սրահում թրջված ու դժգոհ մարդիկ էին նստած: Երկու կին սկսեցին սարսափելի վիճել, քանի որ նրանցից մեկն իր պայուսակի սուր անկյունով պատռել էր մյուսի զուգագուլպան: Մռայլ դեմքերով տղամարդիկ պատուհանից դուրս էին նայում կամ իրենց հեռախոսներով էին զբաղված և նրանցից ոչ ոք իր տեղը հղի կնոջը չէր զիջել: Սրահի օդը ներծծված էր դժգոհությամբ ու բարկությամբ:

Ավտոբուսի վարորդը երբեմն-երբեմն հայելու մեջ էր նայում ու տեսնում, թե ինչ մթնոլորտ է տիրում սրահում: Հերթական կանգառին մոտենալիս նա բարձրախոսով անսպասելի հայտարարություն արեց. «Հարգելի՛ ուղևորներ, գիտեմ, որ բոլորդ հոգնած եք, որ երկար ու դժվար օր եք ունեցել: Ես չեմ կարող եղանակը փոխել և խցանումները վերացնել, բայց կարող եմ մի ուրիշ բան անել: Առաջարկում եմ, որ այն մարդիկ, ովքեր ուզում են վիրավորանքից ու դժգոհությունից ազատվել, առջևի դռնից իջնեն և իմ ափի մեջ դնեն իրենց բոլոր հոգսերը: Իսկ իմ մասին մի մտահոգվեք, ես կուտակված այդ ողջ բեռը վերջին կանգառի մոտ հոսող գետակը կնետեմ»:

Ուղևորները սկսեցին ժպտալ: Եթե մինչ այդ ուշադրություն էլ չէին դարձրել, թե ով է իրենց կողքին նստած, ապա այժմ միմյանց էին նայում և զարմացած ուսերը թոթվում՝ մտածելով, որ վարորդը կատակում է: Բայց երբ հասան հաջորդ կանգառ, նա շրջվեց դեպի սրահն ու ժպտալով մեկնեց ձեռքի ափը: Եվ յուրաքանչյուր ուղևոր, որ պիտի իջներ, անցնում էր նրա կողքով և ձևացնում, թե ինչ-որ բան է դնում նրա ափի մեջ: Մեկը դա ժպիտով էր անում, մյուսը՝ արցունքն աչքերին, բայց բոլորն էլ դիպան նրա ձեռքին, և այդպես շարունակվեց մինչև վերջին կանգառը:

 

Բոլոր մարդիկ էլ դժվարություններ ու խնդիրներ ունեն: Հաճախ ուժասպառ ես լինում և այլևս չես ուզում պայքարել: Օգնության կոչ ես անում՝ մոռանալով, որ նախ ինքդ կարող ես օգնության ձեռք մեկնել որևէ մեկին և հենց այդ կերպ քեզ էլ օգնած կլինես:

 

Ռուսերենից թարգմանությունը՝ Էմիլիա Ապիցարյանի

31.12.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․