23 Հունվար, Գշ, Առաջավորաց պահքի Բ օր

Գրքեր

Սաղմոս ԻԵ

Ի կատարած. սաղմոս Դավթի: Սա ավելի առաջ է երգել, քան թե նախորդ սաղմոսը, քանզի այնտեղ խոստովանում է մեղքերի բազմությունը, իսկ այստեղ պարծենում է անարատությամբ՝ ի շնորհիվ իր Տիրոջ: Հակառակ դեպքում ստացվում է, որ արեգակից էլ մաքուր է, ինչպես որ ասում է.

1. Դա՛տ արա ինձ Տէր՝ զի ես յամբծութեամբ իմում գնացի, ի Տէր յուսացայ՝ զի մի եղէց հիւանդ:

Դա՛տ արա ինձ, Տե՛ր, քանզի անբասիր ընթացա, հույսս դրի Տիրոջ վրա, որ չլինեմ տկար:

Այն դատավորը կարող է այսպես աղաչել, ով այդպիսին է: Որ չլինեմ տկար՝ մեղքի պատճառով: Տիրոջն է վայել ասել. «Ո՞վ կհանդիմանի ինձ» (Հովհ. 8:46):

2. Փորձեա՛ զիս Տէր քննեա՛ զիս. փորձեա՛ զերիկամունս իմ և զսիրտ իմ:

Փորձի՛ր ինձ, Տե՛ր, և քննի՛ր ինձ, փորձի՛ր երիկամներս ու սիրտս:

Ոսկու պես քո դատաստանի բովով փորձելով՝ անսխալ դատաստանովդ կտեսնես, որ այդպես է: Երկամներն ու սիրտը ցանկություններն ու խորհուրդներն են:

3. Ողորմութիւն քո Տէր առաջի աչաց իմոց. և հաճոյ եղէց ճշմարտութեան քում:

Ողորմությունդ, Տե՛ր, աչքիս առջև է, և ճշմարտությունդ հաճելի է ինձ:

«Ողորմի՛ր ինձ»,- ասում է, և խնայի՛ր ինձ, քանզի հաճելի կլինեմ ճշմարիտ պսակողիդ, նաև՝ քո ողորմության վրա եմ հույսս դնում, այլ ոչ թե իմ գործերի:

4. Ո՛չ նստայց ես յաթոռս նանրաց. և ընդ անօրէնս ես ո՛չ մտից:

Ունայնամիտների աթոռին ես չեմ նստի և անօրենների մոտ ես չեմ գնա:

Թեև այստեղ նկատի ունի այլազգիների [այսինքն՝ կռապաշտների] հետ կենցաղավարելը, սակայն Տերն էլ [զգուշացնում է հեռու մնալ] փարիսեցիներից և դպիրներից:

5. Ատեցի ես զժողովս չարաց, և ընդ ամբարիշտս ես ո՛չ նստայց:

Չարագործների ամբոխը ես ատեցի և ամբարիշտների կողքին չեմ բազմի:

Դավիթը՝ հեթանոսներին, իսկ Տերը՝ հերձվածողներին:

6. Լուացայց սրբութեամբ զձեռս իմ. և շուրջ եղէց զսեղանով քո Տէր:

Սրբութեամբ կլվամ ձեռքերն իմ և սեղանիդ շուրջը կնստեմ, Տե՛ր:

Կլվամ մարդահաճության գործերից և սեղանիդ շուրջը կնստեմ պատարագ մատուցելու համար, այլ ոչ թե Սավուղի պես:

7. Լսել ինձ զձայն օրհնութեան քո, և պատմել զամենայն սքանչելիս քո:

Թող լսեմ քո օրհնության ձայնը և պատմեմ քո բոլոր հրաշալիքները:

Քահանաներից շատերը լսում էին (տե՛ս Գործք 6:7)՝ ականջները մաքուր պահելով:

8. Տէր սիրեցի զվայելչութիւն տան քոյ և զտեղի յարկի փառաց քոց:

Տե՛ր, սիրեցի քո տան վայելչությունը և քո փառքի բնակության վայրը:

Այսինքն՝ խորանի և բնակության վայրը՝ տապանակի արկղը, նաև եկեղեցին և վերնայինը, և ով այս ամենը սիրում է, ատում է հեթանոսներին և հերձվածողներին:

9. Մի՛ կորուսաներ ընդ ամբարիշտս զանձն իմ. և մի՛ ընդ արս արիւնահեղ զկեանս իմ:

Մի՛ կործանիր ինձ ամբարիշտների հետ և ո՛չ էլ կյանքս՝ արյունահեղների հետ:

Հեթանոսների, Սավուղի և հերձվածողների հետ:

10. Որոց ձեռք իւրեանց յանօրէնութեան են. և աջ նոցա լի է կաշառօք:

Որոնց ձեռքերն անօրինության մեջ են, և աջը նրանց լի է կաշառքով:

Նորից մեղանչում են ձեռքով՝ սպանությամբ և նրանց աջը կաշառքով լի աջ է:

11. Ես յամբծութեան իմում գնացի. փրկեա՛ զիս Տեր և ողորմեա ինձ:

Ես անբասիր ընթացա, փրկի՛ր ինձ, Տե՛ր, և ողորմի՛ր ինձ:

Սավուղի առաջ անբասիր եղա:

12. Ոտն իմ կացցէ յուղղութեան. յեկեղեցիս մեծս օրհնեցից զքեզ:

Ոտքն իմ ուղիղ ճանապարհների վրա թող լինի, մեծ հավաքներում քեզ պիտի օրհնեմ:

Իր վարքի մասին է ասում, որ այսուհետև Տիրոջ օգնությամբ է ուղղելու: Մեծ հավաքներում. Զատկին, Հոգեգալուստին, տաղավար տոներին: Դարձյալ՝ մեծ հավաքներում՝ սուրբ կաթողիկեում: Դավթի միջոցով օրհնվում են բոլոր ազգերն և լեզուները, նաև՝ երկնային եկեղեցու դռները բոլորի առջև բացվում են:

 

 

Վարդան Արևելցի, Մեկնութիւն Սաղմոսացն Դաւթի, Էջմիածին, 1797 թ.

Գրաբարից թարգմանեց Գայանե Թերզյանը

04.09.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․