Գրքեր

Սբ. Հովհաննես Կարապետի և Աթանագինե եպիսկոպոսի նշխարների փոխադրությունը Հայաստան

Աթանագինեն քրիստոնյա ծնողների զավակ էր, ապրում էր Սեբաստիայում՝ Դիոկղետիանոս կայսեր օրոք: Ամուսնացած էր, ուներ երկու զավակ: Պատմվում է, որ սարսափ սփռող մի վիշապի իր աղոթքով հաղթելով, Սեբաստիայի մետրոպոլիտի կողմից իբրև վարձատրություն ստանում է եպիսկոպոսական ձեռնադրություն և ծառայության անցնում Պիտակտո քաղաքում: Աթանագինե եպիսկոպոսը բարբարոսների ձեռքը ընկած գերիների ազատմանն է նվիրվում: Գործած հրաշքներով և կատարած քարոզություներով դարձի է բերում բազմաթիվ հեթանոսների: Ագրիկողայոս դատավորի օրոք, երբ Սեբաստիայում հալածանքը սաստկանում է, Աթանագինեն այցելում է բանտարկյալներին և քաջալերում նրանց: Իր համբավը հասնում է մինչև Դիոկղետիանոսին և Մաքսիմիանոսին: Ագրիկողայոսը կայսերական հրաման է ստանում սպանելու Աթանագինե եպիսկոպոսին: Վերջինիս աշակերտներից ոմանք իրենից առաջ արդեն ձերբակալվել և նահատակվել էին:

Աթանագինեն իր տասը աշակերտների հետ ատյան է տարվում: Նրանք բոլորն էլ հրաժարվում են կուռքերին զոհ մատուցել և նահատակվում են:

Նախքան Տրդատի մոտ ծառայության անցնելը, Սբ. Գրիգոր Լուսավորիչը Աթանագինեի քրոջ՝ Մարիամի հետ էր ամուսնացած: Սուրբ Գրիգոր Լուսավորիչը Կեսարիայում ձեռնադրություն ստանալուց հետո, երբ Հայաստան է վերադառնում, իր հետ բերում է Սբ. Հովհաննես Մկրտչի (Կարապետի) և Աթանագինե եպիսկոպոսի մասունքները: Աշտիշատում նա կործանում է Վահագնի, Անահիտի և Աստղիկ-Ափրոդիտեի մեհյանները, Իննակնյա կոչված վայրում ամփոփում այդ մասունքները և մի վկայարան կառուցում դրանց վրա՝ պատվիրելով, որ ամեն տարի հավաքվեն այդտեղ՝ սրբերի հիշատակը տոնելու համար:

Աշտիշատից Վաղարշապատ ուղևորվելիս Լուսավորիչը կանգ է առնում Բագավանում, ուր իրեն դիմավորում է Տրդատը՝ իր արքունիքով: Սբ. Գրիգոր Լուսավորիչը այստեղ ևս ամփոփում է Հովհաննես Մկրտչի և Աթանագինեի մասունքների մնացյալ մասը և դրանց վրա վկայարան կառուցում ու սեղան հիմնում, Սբ. Պատարագ մատուցում և պատվիրում միաժամանակ, որ ամեն տարի Նավասարդի օրը, որ Բագավանում տոնվում էր Ամանորի չաստծո՝ Հյուրընկալ Վանատուրի տոնը, հետայդու տոնեն Սբ. Հովհաննես Մկրտչի և Սբ. Աթանագինեի հիշատակները: Այսպիսով Վանատուր Արամազդի Նավասարդյան տոնը փոխանակվեց Հովհաննես Մկրտչի և Աթանագինե վկայի նվիրված հոգևոր հանդիսություններով: Իսկ Նավասարդի կամ Ամանորի առիթով երկրի բերքերի երախայրիքը Արամազդի ընծայաբերելու սովորությունը ստացավ քրիստոնեական նվիրագործում հանուն Աստվածածնի:

 

 

Կազմեց Կարինե Սուգիկյանը

26.05.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․