Գրքեր

Տեր Գրիգոր քհն. Գրիգորյանի Սուրբ Ծննդյան շնորհավորական խոսքը

Սիրասո՛ւն եղբայրներ և քույրեր ի Տեր Հիսուս Քրիստոս,

«Այսօր տօն է սուրբ ծննդեան… Տեառն մերոյ եւ յայտնութեան». Սուրբ Ծննդյան այս քաղցրալուր ու հոգեզմայլ շարականն է այսօր հնչում յուրաքանչյուրիս հոգում, և ես մեծ սիրով շնորհավորում եմ բոլորիս այս լույսի, հույսի, հրաշքի ու սիրո տոնի կապակցությամբ: Այսօր մեր Երկանավոր Հայրը, Մայր եկեղեցու շուրթերով, մեզ մեծ ավետիս ու հրավեր է ուղարկում՝ այցելելու բեթղեհեմյան քարայր ու սեփական աչքերով տեսնելու սքանչելի Մանկանը: Այսօր Տեր Աստված մեզ հանդիպման է կանչում, սիրելի՛ հավատացյալներ: Կանչում է՝ մասնակիցը լինելու զարմանահրաշ ու հոգեցունց մի հանդիպման՝ մարդ-արարածի կյանքի կարևորագույն ու որոշիչ հանդիպմանը:

Քարայրի մուտքը լուսաշող ու բաց է, շուրջը հնչող հրեշտակների օրհներգությունը՝ քաղցր ու հոգեհարազատ, վերում փայլող բեթղեհեմյան աստղը՝ պայծառ ու ոգևորող: Բայց ես ուզում եմ, որպեսզի մի պահ երկյուղածորեն կանգ առնենք այրի մուտքի մոտ՝ խորապես գիտակցելու այն մեծագույն խորհուրդը, որի անմիջական մասնակիցն ենք դառնալու բոլորս: Ուզում եմ լռենք, որպեսզի կարողանանք ունկնդրել աստվածային խաղաղությունը, որ մեզ է սպասում քարայրի ներսում: Ուզում եմ փակենք մեր աչքերն ու հոգևոր հայացքով տեսնենք փրկչական լույսը, որ մեզ է սպասում անձավի շեմից անդին: Ուզում եմ ներս մտնելուց առաջ մեզնից թոթափենք հին մարդուն՝ իր վախերով ու թերահավատությամբ, կրքերով ու մոլորությամբ և բաղձալի հանդիպմանը ներկայանանք ապաշխարությամբ լվացված ու մաքրված հոգևոր նոր հանդերձներով:

Բարձրյալն Աստված մեծագույն պատիվ ու ողորմություն է արել մեզ՝ Իր Միածնին մեր փրկության համար աշխարհ ուղարկելով, ուստի հուշիկ քայլերո՛վ մոտենանք կատարյալ Սրբությանը և ծո՛ւնկ խոնարհենք Աստվածորդի մանուկ Քրիստոսի ու Նրա չքնաղագեղ սուրբ Մոր առջև: Թո՛ւյլ տանք, որպեսզի «անհաս ու անսկիզբ խորին Խորհուրդը» մեր սրտում էլ ծնունդ առնի, որպեսզի մանուկ Էմմանուել ևս մեկ անգամ վստահեցնի ինձ ու քեզ, որ «Աստված մեզ հետ է» (հմմտ. Մտթ. 1:23):

Այսօր Հայրը ժպտում է մեզ, սիրելի՛ հավատացյալներ և հրավիրում ոտքի կանգնելու: Այսօր մեր Փրկիչը հույսի, հավատի ու սիրո անմար կանթեղ է վառում Իր մսուրին ուխտավորաբար այցելած յուրաքանչյուրի հոգում՝ այն աշխարհին տանելու մեծագույն պատվիրանով: Ուստի, զորացե՛ք, քաջալերվեցե՛ք ու մխիթարվեցե՛ք սուրբծննդյան ավետիսով. հազարամյակների բաժանումից հետո Ամենակալ Արքան, Երկնային Հայրը հաշտության ձեռք է մեկնում անհատապես յուրաքանչյուրիս, փրկության կանչում և հրավիրում՝ Իրեն միավորվելու՝ սիրելի Որդու միջոցով: Արդ, համարձակորեն ընդառա՛ջ գնանք Բարեգութ Տիրոջը՝ աղերսելով, որպեսզի Փրկչի Ծննդյան աննվազ լույսը տարածվի ողջ աշխարհում և Հայոց երկնակամարում՝ հալածելով ու չքացնելով չարն ու խավարը, և բաղձալի խաղաղությունը հաստատելով յուրաքանչյուրիս հոգում, օջախում ու մեր երկրում: Եվ թող որ բոլորիս շուրթերն այսօր օրհնեն Փրկչին ու հռչակեն երկնային ավետիսն ի լուր համայն աշխարհի. «Քրիստոս ծնաւ եւ յայտնեցավ Ձեզ եւ մեզ մեծ ավետիս»:

 

Աղոթքով և օրհնությամբ՝

Տեր Գրիգոր քհն. Գրիգորյան

Զորավոր Սուրբ Աստվածածին եկեղեցու հոգևոր հովիվ

05.01.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․