Գրքեր

Աստծո պարգևների մասին

Հաճելի արտաքինով, մոտ քսան տարեկան մի աղջկա եմ հիշում: Նա ինձ մոտ եկավ, նստեց ու դեմքի սարսափելի արտահայտությամբ ասաց.

- Ես չեմ կարող փրկվել, ես կործանվում եմ փառասիրությունից:

- Իսկ ի՞նչ ես անում դրա դեմ:

- Չգիտեմ ինչ անել, ես պայքարում եմ դրա դեմ, բայց փառասիրությունը հաղթում է:

- Իսկ ինչո՞ւմ է կայանում քո փառասիրությունը:

- Ամեն անգամ, երբ տեսնում եմ ինձ հայելու կամ արտացոլումս ապակու մեջ, մտածում եմ՝ ի՜նչ լավիկն եմ:

Ես ժպտալով ասացի.

- Բայց դա իսկապես այդպես է:

Նա սարսափահար ինձ նայեց ու բացականչեց.

- Այդ դեպքում ի՞նչ անեմ, ես կործանված եմ:

- Ոչ, կործանված չես: Պիտի սովորես փառասիրությունդ երախտագիտության վերածել: Թե՛ դու, թե՛ ես դեռ շատ հեռու ենք խոնարհությունից, մենք չգիտենք, թե դա ինչ բան է, դա սրբերի հատկությունն է: Իսկ երախտագիտությունն այնպիսի հատկություն է, որ մեզնից յուրաքանչյուրը կարող է ուզածդ պահի ձեռք բերել:

- Իսկ ինչպե՞ս այդ անել:

- Ահա, թե ինչ արա: Օրը երեք անգամ կանգնիր հայելու դիմաց և թվարկիր այն բոլոր դիմագծերդ, որ քեզ դուր են գալիս՝ ճակատդ, հոնքերդ, աչքերդ, քիթդ, շրթունքներդ, այտերդ, մի խոսքով այն ամենն, ինչ քեզ լավն է թվում: Եվ երբ ավարտես, ասա. «Տե՛ր Աստված, շնորհակալ եմ Քեզ, որ այդ ամենը նվիրել ես ինձ, որովհետև ես չեմ ստեղծել դրանք ինձ համար»: Եվ ավելացրու. «Եվ ներիր ինձ, Տե՛ր, որ Քո տված գեղեցկության վրա այնպիսի զզվելի արտահայտություն եմ դնում, որը հիմա դեմքիս է»:

Կարծում եմ, որ սա կարելի է կիրառել նաև հոգևոր հատկանիշների վրա: Նրանք են «հոգով աղքատ», ովքեր գիտակցում են, որ այն ամենն, ինչ ունեն՝ Աստծուց է, և կեղծ խոնարհություն ձեռք բերելու համար դրանցից հրաժարվելու և ժխտելու փոխարեն, նրանք ընդունում են դա և Աստծուն երախտագիտություն են հայտնում, որ այդ ամենը տվել է իրենց:

 

Միտրոպոլիտ Անտոնի Սուրոժսկի

Ռուսերենից թարգմանությունը՝ Էմիլիա Ապիցարյանի

03.02.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․