«Ճշմարիտ սերը հարատև է, չի սպառվում և երբեք չի դադարում»

Հանուն Աստծու փառքի գործող քրիստոնյան գործում է իր հոգու փրկության, ինչպես նաև այն հասարակության համար, որտեղ ապրում է և գործում: Աստծու և մերձավորի հանդեպ սիրառատ կյանքով է քրիստոնյան ճանաչվում որպես Քրիստոսի հետևորդ: «Եթե դուք միմյանց սիրեք, դրանով մարդիկ կիմանան, որ դուք Իմ աշակերտներն եք» (Հովհ. 13:35),- ասաց Տերն իր աշակերտներին։ «Ինչպես քերականություն, ճարտասանություն, փիլիսոփայություն, արվեստաբանություն ուսանող աշակերտներն են ճանաչվում իրենց  ուսուցիչներով, - բացատրում է Սիմեոն Նոր Աստվածաբանը, - այնպես էլ քրիստոնյան՝ Քրիստոսի աշակերտն է ճանաչվում Քրիստոսով՝ բարի Ուսուցչով, Ով այնքան սիրեց մեզ, որ հանուն մեզ մարդացավ և Իր հոգին որպես փրկագին տվեց մեզ համար»: Որպեսզի սերը աճի և զարգանա, պետք է ակտիվորեն դրսևորվի մերձավորի հանդեպ սիրո, ուշադրության և բարի գործերի մեջ:

Նոյեմբերի 17-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, եկեղեցու սոցիալական ծրագրի շրջանակում, Բալայան Բաբկենին (70 տ.) փոխանցեց դրամական աջակցություն (100 000 դրամ), որ տրամադրել էր համայնքից Աբրահամյան Քրիստիանը: Բաբկենն իր կնոջ, տղայի, հարսի և չորս անչափահաս թոռնիկների հետ բռնի տեղահանվել է Արցախի Մարտակերտի շրջանի Վանք գյուղից: Բաբկենի տղան մասնակցել է Արցախյան քառօրյա, 44-օրյա և 2023-ի սեպտեմբերի 19-ին Ադրբեջանի կողմից սանձազերծած պատերազմներին: Բաբկենի թոռներից մեկը Դաունի համախտանիշ ունի: Այժմ Բալայան ընտանիքը վարձակալությամբ բնակվում է Ավան Առինջ 1 միկրո, 2/13, 37 բն. հասցեում:

«Որտեղ սերն է, այնտեղ մշտապես վստահությունն է, որտեղ սերն է, այտեղ մշտապես հույսն է: Սերն ամեն ինչ տանում է, որովհետև ուժեղ է: Ճշմարիտ սերը հարատև է, չի սպառվում և երբեք չի դադարում»,- ասել է սբ. Ղուկաս Ղրիմեցին:

Կարինե Սուգիկյան