1 Մարտ, Բշ, Մեծ պահքի ԺԵ օր

Գրքեր

Երաժշտական երեկո. Լույսը Արևների համար

Ապրիլի 25-ին, Զորավոր Ս. Աստվածածին եկեղեցու և «Արև-երեխաներ» ՀԿ-ի նախաձեռնությամբ, արև երեխաները Կոմիտասի թանգարան-ինստիտուտի համերգասրահում մասնակից եղան «Լույսը Արևների համար» խորագիրը կրող համերգային միջոցառմանը: Ազատ ձևաչափով համերգային ծրագիրն արև երեխաների համար երգի անկաշկանդ ու ջերմ հարթակ էր ստեղծել: Մինչ միջոցառումը համերգային ծրագրերի բաժնի վարիչ և «Լույս» վոկալ հնգյակի անդամ Հասմիկ Բաղդասարյանը շնորհակալություն հայտնեց Զորավոր Ս. Աստվածածին եկեղեցու հոգևոր հովիվ և «Արև-երեխաներ» ՀԿ-ի հոգաբարձուների խորհրդի նախագահ Տեր Գրիգոր քահանա Գրիգորյանին՝ արև երեխաների մաքուր աշխարհի հետ երգի միջոցով հաղորդակցվելու հիանալի առիթի համար: Առաջին երգերը, որոնցով «Լույս» վոկալ հնգյակը հաղորդակցվեց արևների հետ, «Արի, իմ սոխակ» և «Կաքավի գովքը» երգերն էին, որոնք էլ երեխաները մեծ ոգևորությամբ սովորեցին և երգեցին երեկոյի ընթացքում: Արև երեխաների հետ երգում էին նրանց ծնողները: Կոմիտասյան յուրահատուկ միջավայրում «Լույս» վոկալ հնգյակը ներկայացրեց հայ ժողովրդի առօրյան ներկայացնող և նրանից ծնունդ առած երգերը: Երաժշտական երեկոն երեխաներին հաղորդ դարձրեց հայ ժողովրդական երգի հարուստ և բազմազան շերտերին: Այն հարցերին, թե ի՞նչ է ազգային երաժշտությունը և ի՞նչն է նյութ տալիս ազգային ժողովրդական երգերին, Կոմիտաս վարդապետը պատասխանել է. «Արդյո՞ք նրա հպարտ լեռները, խոր ձորերը, դաշտերը, բազմազան կլիման, պատմական հազար ու մի դեպքերն ու անցքերը, ժողովրդի ներքին և արտաքին կյանքը.- այո՛, այս բոլորը, բոլորը նյութ են կազմում ազգային երաժշտության, մի խոսքով՝ այն ամենը, ինչ ազդում է այդ ազգի զգայարանքների և մտքի վրա»։

Հայ երգի երեկոյի ավարտին Տեր Գրիգորը արև երեխաների և նրանց ծնողների անունից շնորհակալություն հայտնեց «Լույս» վոկալ հնգյակին՝ արև երեխաներին պարգևած ջերմ ու լուսավոր երեկոյի համար: «Առաջին անգամ հատուկ արևների համար ազատ ձևաչափի մեջ կազմակերպված այս միջոցառումը կհիշվի բոլորիս կողմից: Հարության տոն, լույսի տոն և «Լույս» վոկալ հնգյակի ելույթն արև երեխաների համար. համընկումների հետաքրքիր այս շղթան էլ որոշեց միջոցառման խորագիրը՝ «Լույսը Արևների համար»»,- ասաց Տեր Գրիգորը և «Լույս» վոկալ հնգյակին նվիրեց հարության խորհրդանիշ համարվող ձուն, «Պատարագամատույց» և աղոթագրքեր: Արև երեխաներից Սարգսի մայրն էլ իր հերթին շնորհակալություն հայտնեց «Լույս» վոկալ հնգյակին և Տեր Գրիգորին՝ արև երեխաների համար առաջին անգամ կազմակերպված հաճելի և անմոռանալի երեկոյի համար:

Հայ ժողովրդական երգի երեկոն մեծ ոգևորություն և ուրախություն էր պատճառել արև երեխաներին, ովքեր հրաժեշտ տվեցին «Լույս» վոկալ հնգյակին՝ նորից հանդիպելու ակնկալիքով:

 

Կարինե Սուգիկյան

25.04.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․