26 Հունվար, Գշ, Առաջավորաց պահքի Բ օր

Գրքեր

Կապանքների քաղաքը

Մի վաճառական մի օտար երկիր գնաց ու հայտնվեց տարօրինակ մի քաղաքում, ուր բոլոր բնակիչները կապանքներ ունեին: Վաճառականը մտածեց. «Իսկ եթե ինձ էլ կապանքներ հագցնեն, ի՞նչ անեմ այնժամ»:

Անսպասելիորեն, պահազորը հայտնվեց նույն վայրկյանին և նոր ազատ մարդ տեսնելով՝ շղթայեց նրան: Վաճառականը վհատվեց՝ տուն վերադառնալու հնարավորությունը կորցնելով: Նա հարց ու փորձ արեց դժբախտ բնակիչներին, թե ինչու են բոլորը կապանքներով և նրանք պատասխանեցին, որ իրենց քաղաքում վաղուց այդպիսի կարգեր են:

Վաճառականը հարցրեց.

- Մի՞թե քաղաքի բոլոր բնակիչները ստիպված են իրենց ողջ կյանքը կապանքներ կրել:

Մարդիկ պատասխանեցին.

- Ասում են, որ երբեմն մի ծերունի է քաղաք գալիս, ով ազատ է և կապանքներ չի կրում: Միայն նա գիտի ինչպես ազատվել դրանցից: Սակայն նա այնքան հազվադեպ է գալիս, որ մարդիկ կասկածում են դրա ճշմարտացիությանը:

«Այլ ելք չկա,- մտածեց վաճառականը,- հնարավոր է դեռ կտեսնեմ այդ ծերունուն և կիմանամ, թե ինչպես կարող եմ ազատվել»:

Շատ տարիներ անցան: Վաճառականն արդեն ծերացավ, մազերը ճերմակեցին: Եվ ահա, մի անգամ, հանկարծակի տեսավ ծերունուն, որ ազատ էր կապանքներից ու քայլում էր փողոցում:

- Պապի՛կ,- բացականչեց կալանավորը,- օգնիր այս կապանքներից ազատվել:

- Որդյա՛կ,- պատասխանեց ծերունին,- մտքումդ այսպես ասա. «Թող պահակազորն ինձ անմիջապես ազատ արձակի կապանքներից», և ազատ կլինես:

Կալանավորը մտածեց, որ դա մի անհաջող, դառը կատակ է, բայց որոշեց փորձել և մտքում արտասանեց այդ բաղձալի բառերը: Պահակազորն անմիջապես հայտնվեց ու նրան ազատ արձակեց:

Վաճառականը շտապեց հեռանալ այդ տարօրինակ քաղաքից: Դարպասներից դուրս վազելով՝ կրկին տեսավ այն ծերունուն, ով իրեն օգնել էր ազատվել:

- Ասա ինձ, պապի՛կ,- դիմեց նրան վաճառականը,- ո՞րն է այս տարօրինակ քաղաքի գաղտնիքը:

- Սա հասարակ քաղաք չէ,- պատասխանեց ծերունին,- որովհետև մարդիկ կալանավոր են դառնում և ազատվում են կապանքներից՝ միայն այդ մասին մտածելով: Եվ դու էլ փրկվեցիր, որովհետև հավատացիր իմ խոսքերին: Իսկ նրանք, ովքեր ինձ չեն հավատում՝ մնում են այս քաղաքի կալանավորները և ես այլևս ոչնչով չեմ կարող նրանց օգնել:

«…Եթե դուք իմ ուսուցմանը հավատարիմ մնաք, իմ ճշմարիտ աշակերտները կլինեք։ Եվ կճանաչեք ճշմարտությունը, և ճշմարտությունը ձեզ կ՚ազատի» (Հովհ. 8:31-32):

 

Ռուսերենից թարգմանությունը՝ Էմիլիա Ապիցարյանի

09.01.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․