13 Օգոստոս, Եշ, Աստվածածնի պահքի Դ օր

Գրքեր

Լաբիրինթոս

Կիթառահար երաժիշտը մի ամայի դաշտում մեն-մենակ նվագում է, հետո հայացքն ուղղում դեպի երկինքն ու երկիրը. ամեն ինչ անգույն է և գորշ... Իր երևակայությամբ պատկերացնում է այն վայրը, ուր ապրելը լիակատար իմաստավորված է համարում, որը լեցուն է երփներանգ գույների բազմազանությամբ և կյանքի մեղեդու ռիթմերի համաչափությամբ: Բայց հասնում է մի լաբիրինթոսի մոտ, որից այն կողմ տեսնում է իր պատկերացումների արքայությունը և ասում.

- Ի վերջո գտա երկնքի արքայության մուտքը, որտեղ կարելի է ապրել և հոգևոր խաղաղության երջանկությունը գտնել:

Մտնում է լաբիրինթոսի մեջ, պտտվում և գալիս, կանգնում նույն մուտքի առջև: Նորից լաբիրինթոսի արահետներով շարժվում, խճճվում ու հայտնվում է սկզբնավայրում և այդպես շարունակ մի քանի անգամ: Երևակայությունից վհատված վերադառնալով դեպի իրականություն՝ զգում է իր մոտ կանգնած Հիսուսին: Նա լռելյայն լսում էր կիթառահարի երաժշտությունը, այնուհետև ասում է.

- Ինչո՞ւ ես բազում անգամ հեռանում ու վհատված նույն կետին վերադառնում և կրկին լաբիրինթոսի ուղին ընտրում, չէ որ ես միշտ էլ քո կողքին եմ: Արդեն իսկ այնտեղ եմ, որտեղից շարժվում ես ինձ այլ վայրում փնտրելու համար...

Կիթառահարը նայում է շուրջը, նկատում, որ երկինքն ու երկիրն ամենևին էլ անգույն ու գորշ չեն, այլ լեցուն գույներով, լույսով ու կյանքն ապրելու լիակատար իմաստով, որ այն, ինչ փնտրում էր, իմաստավորված և արժևորված է Քրիստոսի ներկայությամբ:

 

Հովհաննես Մանուկյան

07.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․