Օրհնվեցին երդման հանդիսավոր արարողության մասնակիցները | Orhnvecin Erdman Handisavor Araroghutyan Masnakicnery



Գրքեր

Օրհնվեցին երդման հանդիսավոր արարողության մասնակիցները

Հունվարի 22-ին հայ բանաստեղծ, գրականագետ և թարգմանիչ Լևոն Միրիջանյանի ծննդյան 86-րդ հոբելյանի առթիվ նրա անունը կրող Երևանի թիվ 155 հիմնական դպրոցում տեղի ունեցավ առաջին դասարանցիների երդման հանդիսավոր արարողություն: Զորավոր Ս. Աստվածածին եկեղեցու խորհրդակատար Տեր Վահան քահանա Առաքելյանի գլխավորությամբ՝ արարողությունը սկսվեց «Տերունական» աղոթքով: Ավանդույթի համաձայն՝ ամեն տարի դպրոցը բանաստեղծի ծննդյան օրը նշում է մեծ տոնակատությամբ և հանդիսավոր երդման արարողությամբ: Միջոցառման ընթացքում փոքրիկները մեծ ոգևորությամբ բեմադրեցին Լևոն Միրիջանյանի բանաստեղծությունները, ապա մասնակցեցին հանդիսավոր, միևնույն ժամանակ պարտավորեցնող արարողությանը: Առաջին դասարանցիները՝ որպես միրիջանյականներ, երդումով խոստացան լինել ազգային բարձր արժեքների ջահակիրը, վառ պահել մաշտոցյան իմաստասիրաց կանթեղը, կարգապահ լինել, սիրել և հարգել կրթության և գիտության լույսը սփռող ուսուցիչներին, ստացած գիտելիքներով նպաստել հայրենիքի հզորացմանը, ամրապնդմանն ու բարգավաճմանը, լինել հերոս նախնիների արժանի հետևորդը, սիրել մայրը դպրոցը ՝ արժանի լինելով միրիջանյական բարձր կոչմանը:

«Իր բանաստեղծություններից մեկում Լևոն Միրիջանյանն ասում է՝ ես գնում եմ դեպի բարին, օրհնությունն իմ ճանապարհին: Բանաստեղծի ճանապարհը իսկապես օրհնյալ էր, այն սիրո, բարության և լուսավոր մի ուղի էր, որին հետևելու են մեր փոքրիկ միրիջանյականները»,-ասաց դպրոցի տնօրեն Լուսինե Դանիելյանը և շնորհավորեց նրանց՝ մաղթելով, որ միշտ վառ պահեն մաշտոցյան իմաստասիրաց կանթեղը՝ նրանով լուսավորված անցնելու գիտության փառահեղ ուղիներով:

Այնուհետև Տեր Վահանը ներկաներին փոխանցեց ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությունը և մանուկների օրհնության կարգ կատարեց: «Մանուկների անմեղությունը ոգևորում է մեզ բոլորիս: Մեր Տերը՝ Հիսուս Քրիստոս, պատգամեց և ասաց. «Հաստա՛տ իմացեք, որ եթե չփոխվեք ու չլինեք մանուկների նման, Երկնքի Արքայությունը չեք մտնի: Արդ, ով իր անձը խոնարհեցի այս մանկան նման, նա՛ է մեծը Երկնքի Արքայության մեջ: Եվ ով որ Իմ անունով մի այդպիսի մանուկ ընդունի, Ի՛նձ ընդունած կլինի» (Մատթ. 18:2-5): Մենք էլ առաջացած տարիքում հարկ է մանկան անմեղությունը մեր հոգում կրենք՝ արժանանալու համար Աստծո օրհնությանը»,- ասաց Տեր Վահանը:

 

 

Կարինե Սուգիկյան

22.01.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․