19 Նոյեմբեր, Բշ, Հիսնակաց պահքի Ա օր

Գրքեր

Դեպի Արցախ աշխարհ ձգվող ուխտի լուսավոր ճանապարհը

Ուխտավորը, ապաշխարության և փառաբանության ուղի անցնելով, ազատորեն ու կամովին հաղորդակցվում է լույսի հետ և լուսավորվում. «Տե՛ր, Քեզնից է կյանքի աղբյուրը, և երեսիդ լույսով ենք լույսդ տեսնում» (Սաղմ. 35:10): Դեպի լույս տանող ուղին նաև սխրանքի ուղի է, քանի որ անձուկ է դուռը և նեղ՝ ճանապարհը, որ տանում է դեպի կյանք (Մատթ. 7:14): Արդարության Արեգակի լույսով նորոգվելու մղումով՝ Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ և հոգևոր հովիվ Տեր Գրիգոր քահանա Գրիգորյանի առաջնորդությամբ, օգոստոսի 25-ին վաղ առավոտյան երկօրյա ուխտագնացության մեկնեց Արցախ աշխարհ:

Քրիստոսի լույսն Արցախ աշխարհ է թափանցել Հայ եկեղեցու առաջին լուսավորիչներից Ս. Թադեոս առաքյալի աշակերտ՝ Ս. Դադիի կողմից: Զորավոր Ս. Աստվածածին եկեղեցու ուխտավորներն առաջինն այցելեցին Դադիվանք՝ այն սրբավայրը, որ, ըստ ավանդության, հիմնադրվել է 1-ին դարում՝ քրիստոնեական քարոզչության համար նահատակված Ս. Դադիի գերեզմանի տեղում: Դադիվանքի վանահայր Տեր Հովհաննես քահանա Հովհաննիսյանն ուխտավորներին մանրամասնորեն ներկայացրեց վանքի պատմությունը: Վանական համալիրի գլխավոր՝ Կաթողիկե եկեղեցին և Ս. Նշանը կառուցվել են 13-րդ դարում, իսկ Կաթողիկեի հյուսիսարևմտյան կողմում գտնվող Ս. Դադի եկեղեցին՝ 10-11-րդ դարերում: Ուխտավորներին հիացրեց վանքի Ս. Ստեփանոս նախավկայի նահատակության և Ս. Նիկողայոս Սքանչելագործ հայրապետի մասին պատմող հազվագյուտ և ինքնատիպ որմնանկարները, որոնք վերջին տարիներին են նորոգվել: Այնուհետև ուխտավորները, Ս. Դադիի գերեզմանի առջև խոնարհվելով, սրբի բարեխոսությանը դիմելով, Տիրոջ ողորմածությունը հայցեցին Հայոց ու Արցախ աշխարհների, Հայ եկեղեցու և Հայոց բանակի համար:

Հաջորդ սրբավայրում՝ Շուշիի Ղազանչեցոց Ս. Ամենափրկիչ եկեղեցում (1868-1887 թթ.), ուխտավորները մասնակցեցին Երեկոյան ժամերգության, որ անցկացրեց եկեղեցու հոգևոր հովիվ Տեր Անդրեաս քահանա Թավադյանը:

Զորավոր Ս. Աստվածածին եկեղեցու ուխտավորները գիշերն անցկացրին Գանձասար վանքին կից կացարաններում: Հաջորդ օրը՝ Ս. Աստվածածնի գոտու գտնվելու հիշատակության օրը, Գանձասարի Ս. Հովհաննես Մկրտիչ եկեղեցում (13-րդ դ.) նրանք մասնակցեցին Ս. Պատարագին, որ մատուցեց Եկատերինբուրգի Ս. Հովհաննես Կարապետ եկեղեցու հոգևոր հովիվ Տեր Արիստակես քահանա Հովհաննիսյանը, ով իր համայնքի հետ ևս ուխտավորաբար Արցախ աշխարհում էր գտնվում: Մինչ քարոզը Արցախի թեմի փոխառաջնորդ, Գանձասարի վանահայր Տ. Սահակ վարդապետ Շաքարյանն ողջունեց ուխտավորներին և նրանց փոխանցեց Արցախի թեմի առաջնորդ Գերաշնորհ Տ. Պարգև արք. Մարտիրոսյանի օրհնությունը: Հայր Սուրբը նշեց, որ ուխտավորների աղոթական ներկայությունը մեծ ուրախություն է պատճառել իրենց, մաղթեց, որ Տերն ի կատար ածի նրանց բոլորի ուխտը՝ Ս. Աստվածամոր և Ս. Հովհաննես Մկրտչի բարեխոսությամբ, ապա

Աստվածամոր տոնի առթիվ շնորհավորեց կանանց: Այնուհետև պատարագիչ քահանան օրվա տոնի վերաբերյալ քարոզ խոսեց:

Հավարտ Ս. Պատարագի վանքի բակում տեղի ունեցավ ժողովրդական տոնախմբություն, որին իրենց մասնակցությունը բերեցին Վիրահայոց թեմի հոգևոր տեսչության «Ախալցխա» երգի ու պարի համույթը, որ չորս օր է ուխտավորաբար Արցախում էին՝ Ախալցխայի և Բորժոմիի տարածաշրջանների հոգևոր տեսուչ Տ. Հակոբ աբեղա Սահակյանի առաջնորդությամբ:

Տոնախմբության ավարտին ներկաները սիրո ճաշը վայելեցին, ապա Հայր Սահակն ուխտավորներին խորհրդանշական նվերներ՝ Գանձասարի պատկերով նկարներ, նվիրեց: Տեր Գրիգորը շնորհակալություն հայտնեց Հայր Սահակին ջերմ ընդունելության համար՝ ուրախությամբ նշելով, որ Տիրոջ ողորմածությամբ նախնյաց հիշատակներով և սրբավայրերով հարուստ սուրբ հողի վրա իրենք հնարավորություն ունեցան ճաշակելու միասնական աղոթքի կենարար զորությունը:

Աստվածային լույսով նորոգված ուխտավորները՝ որպես աստվածային լույսի ջահակիրներ, վերադարձան Երևան՝ հոգեպես զորացած և լուսավորված: «Աստված լույս է, և Նրա մեջ խավար չկա, բոլորովին չկա: Եթե լույսի մեջ ենք քայլում, ինչպես որ Ինքն է լույսի մեջ, հաղորդության մեջ ենք լինում միմյանց հետ, և Նրա Որդու՝ Հիսուսի արյունը մաքրում է մեզ ամեն մեղքից» (Ա Հովհ. 1:5;7):

 

Կարինե Սուգիկյան

26.08.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․