Երբ կորցնում ես | Erb Korcnum Es



Գրքեր

Երբ կորցնում ես

Մի մտավորական շվարած և տխուր քայլում է ճանապարհով: Մի ազնվական հեծյալ մոտենում է և հարցնում.

- Ի՞նչ է պատահել:

Մտավորականը պատասխանում է.

- Դրամապանակս կորցրեցի, որի մեջ 40 ոսկեդրամ կար: Գնում եմ մասնակցելու կոմսի դղյակում կազմակերպվող մեծ տոնին, սակայն մասնակցության համար անհրաժեշտ է 40 ոսկեդրամ՝ իբրև մուտքավճար, որպեսզի դղյակի դարպասներից ներս անցնեմ և այդ տոնին մասնակից լինեմ:

Հեծյալը հարցնում է.

- Վստահո՞ւմ ես Աստծուն: Եթե վստահում ես, ինչո՞ւ ես տխրում:

Մտավորականը պատասխանում է.

- Այո՛, անշուշտ, վստահում եմ:

Հեծյալն ասում է.

- Այդժամ, հետևի՛ր ինձ, ինքս էլ եմ գնում մասնակցելու այդ տոնին, ունեմ ավելին, քան 40 ոսկեդրամն է և քեզ կօգնեմ ներս մտնել:

Երկուսով մոտենում են դղյակին, մտավորականն ասում է.

- Բայց մենք մոտենում ենք այն դարպասին, որտեղ պետք է վճարել ոչ թե 40, այլ 400 ոսկեդրամ, ավելի լա՞վ չէ մոտենանք մյուս դարպասին, որտեղ քիչ մուտքավճար է:

Հեծյալը պատասխանում է.

- Նորից եմ ասում, եթե Աստծուն վստահում ես, հետևի՛ր ինձ:

Երբ մոտենում են դարպասին, զինվորները զգաստանում են, խոնարհվում, և երկուսով անարգել մտնում են ներս: Մտավորականը զարմանում է.

- Դուք ո՞վ եք...

Անծանոթ հեծյալը պատասխանում է.

- Մի՞թե չճանաչեցիր, այս երկրի թագավորն եմ: Սիրում եմ հաճախ միայնակ զբոսնել: Բայց ամենից կարևորն այն է, որ Աստծո հրեշտակն ինձ երևաց և ասաց, որ դուրս գամ և իմ ճանապարհին հանդիպած մարդուն նույնպես ինձ հետ վերցնեմ, ուղեկցեմ դղյակ, որպեսզի դու նույնպես մասնակցես այս տոնակատարությանը:

Եթե վստահում եք Աստծուն, հավատացե՛ք, օգնությունը չի ուշանա, այն կարող է գալ հոգևոր օրհնության, հոգևոր մխիթարության, խնդության, զորության կամ այլ անհրաժեշտ կերպով, միայն իսկապես հավատացեք և վստահեք Աստծուն, Նա ձեզ միայնակ չի թողնի դժվարության մեջ:

 

Հովհաննես սրկ. Մանուկյան

07.06.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․