Գրքեր

Կարեկցանքով լի աղոթքին հետևում է աստվածային մխիթարությունը

- Հա՛յր, երբ լսում եմ մարդկային վշտերի մասին, ներսումս ասես ամեն ինչ սեղմվում է: Միգուցե դա թերահավատությունի՞ց է:

- Տե՛ս՝ սեփական անձի համար անհանգստությունը թերահավատություն է, իսկ այլոց համար անհանգստությունը՝ կարեկցանք: Մարդկային ցավի հանդեպ ճշմարիտ կարեկցանքը ուղեկցվում է աղոթքով, իսկ դրան հաջորդում է աստվածային մխիթարությունը: Ուստի, աղոթիր որքան կարող ես, այնուհետև ամեն ինչ Աստծուն հանձնիր ու հանդարտվիր: Մի՞թե Աստված Իր արարածի համար ավելի քիչ է անհանգստանում, քան դու: Հապա էլ ինչո՞ւ անհանգստանաս: Աստված մեծ մխիթարություն է տալիս նրան, ով հոգեպես կարեկցում է այլոց ու տառապում նրանց համար, այլապես մարդ չի դիմանա: Գիտե՞ք, թե որքան եմ դառնանում, երբ այդքան նամակ եմ ստանում այդչափ խնդիրներ ունեցող մարդկանցից: Բերանումս ասես թույն ու լեղի է հավաքվում ու ոչինչ չեմ կարողանում ուտել: Սակայն այդ ցավից իսկական ուրախություն է ծնվում: Աստված վարձատրում է տառապանքին համապատասխան մխիթարությամբ. այնպիսի մխիթարությամբ է սփոփում, որ չես կարող տանել: Եվ չնայած որ նախքան այդ լալիս ու տառապում էիր ուրիշի համար, այժմ ուրախանում ես: Ասես Աստված քեզ ասելիս լինի. «Մի՛ անհանգստացիր, զավա՛կս, Ես լսեցի քո խնդրանքը»:

 

Պաիսիոս Աթոսացի

Ռուսերենից թարգմանեց Էմիլիա Ապիցարյանը

 

16.01.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․