Ուխտագնացություն՝ հանուն Հայոց ազգի ճշմարիտ ապաշխարության

Փետրվարի 25-ին՝ Մեծ պահքի Անառակի կիրակի օրը, Զորավոր Ս. Աստվածածին եկեղեցու «Զորավոր» երիտասարդաց միությունը Զորավոր Ս. Աստվածածին եկեղեցում մասնակից եղավ  Սուրբ Պատարագի, ապա ուխտի մեկնեց Գեղարդավանք:  Մեծ պահքի յուրաքանչյուր կիրակի «Զորավոր» երիտասարդաց միությունը իմաստավորում է՝ ուխտավորաբար որևէ սրբավայր այցելելով և Հայոց եկեղեցու, ազգի ու բանակի համար միասնական աղոթք հղելով առ Տեր: Երիտասարդների ուխտագնացության մեկնարկը սկսվեց Հայոց հոգևոր կենտրոնից՝ Մայր Աթոռ Սուրբ Էջմիածնից:

Աղոթքի և խոկման ճանապարհին երիտասարդները զրուցեցին օրվա խորհրդի՝ մեղքերը տեսնելու և զղջումով դեպի սիրող Հայրը դառնալու մասին: Զրույցի ընթացքում երիտասարդները, անդրադառնալով ապաշխարությանը, նշեցին, որ այն Աստծու կողմից մարդկությանը տրված անգին մի նվեր է, աստվածային հրաշք, որ ամեն անգամ հնարավորություն է տալիս մարդուն ոտքի կանգնելու: Եկեղեցու հայրերից մեջբերումներ անելով՝ նրանք նշեցին, որ առանց մտքի մաքրության, փորձությունները համբերելու և անդադար աղոթքի, հնարավոր չէ լինել ճշմարիտ ապաշխարության մեջ:

Հասնելով Հայ եկեղեցու առաջին հայրապետի՝ Ս. Գրիգոր Լուսավորչի կողմից հիմնած վանք՝ ուխտավորները համախմբվեցին միասնական աղոթքի շուրջ և Տիրոջ  ողորմությունը  հայցեցին՝ Հայոց ազգի ճշմարիտ ապաշխարության համար: Երիտասարդները վաղ միջնադարյան այս սրբավայրում կարդացին սբ. Ներսես Շնորհալու «Հավատով խոստովանիմ» աղոթաշարը: Այնուհետև ուղևորվեցին Գառնիի Ս. Աստվածածին եկեղեցի, ուր Աստվածամոր բարեխոսությունը հայցեցին և սաղմոսներ ընթերցեցին: Հոգեշահ օրն եզրափակեցին՝ Գառնիի Ս. Աստվածածին մատուռ այցելությամբ:

Ամեն անգամ ուխտի ճանապարհներն ուխտավորներին առաջնորդում են դեպի ուխտավայր՝ եկեղեցի, որ, ըստ Վարդան վարդապետ Այգեկցու, քրիստոնյաների հոգևոր մայրն է ու ծնողը, իսկ սուրբ Ավազանը՝ արգանդը, որով Աստծու որդիներ դարձան և ազատվեցին չարի ծուղակից: Իսկ երբ Աստծու որդիները մասնակից են դառնում Սուրբ Պատարագին, մեծ բարիք ու անբավ շահ են ձեռք բերում հոգու և մարմնի համար:

Կարինե Սուգիկյան