Գրքեր

Սուրբ Ծննդյան պատմություն

Մի մարդ կար, ում համար Սուրբ Ծննդյան տոնն ասես հիմարություն լիներ: Նա բարի ու կարգապահ մարդ էր, առատաձեռն՝ իր ընտանիքի հանդեպ և ազնիվ՝ այլոց հետ հարաբերություններում: Բայց նա չէր հավատում այն ամենին, ինչ Սուրբ Ծննդյան տոնին ասվում էր եկեղեցիներում:

«Ես չեմ ուզում վշտացնել քեզ,- ասաց նա իր կնոջը, որը մշտապես եկեղեցի էր գնում,- բայց ես ուղղակի չեմ կարող հասկանալ, որ Աստված մարդ է դարձել: Ինձ համար դա անմտություն է»:

Սուրբ Ծննդյան տոնի երեկոյան նրա կինն ու երեխաները եկեղեցի գնացին՝ գիշերային հսկմանը մասնակցելու: Նա հրաժարվեց նրանց հետ գնալ: «Ես ինձ երկերեսանի կզգամ,- բացատրեց նա,- ավելի լավ է տանը մնամ ու ձեզ սպասեմ»:

Ընտանիքի մեկնելուց հետո սկսեց ձյուն տեղալ: Տղամարդը բուխարու մոտ նստած թերթ էր կարդում: Որոշ ժամանակ անց նա ցնցվեց խուլ թակոցից: Հետո դրանք կրկնվեցին: Մարդուն թվաց, թե ինչ-որ մեկը ձնագնդիներ է նետում պատուհանին: Երբ դուռը բացեց, որպեսզի տեսնի, թե ինչ ձայներ են, տեսավ ցրտից կծկված թռչունների մի խումբ, որոնք փորձում էին լուսամուտից ներս մտնել՝ պատսպարվելու հույսով:

«Չեմ կարող թույլ տալ, որ խեղճ թռչունները սառչեն,- մտածեց նա,- բայց ինչպե՞ս օգնեմ նրանց»: Եվ նա հիշեց ցախատան մասին, որտեղ թռչունները կարող էին պատսպարվել: Արագ հագավ վերարկուն, ճտքավոր կոշիկներն ու ձյան միջով դեպի ցախատուն շտապեց: Նա լայն բացեց դռներն ու լույսը միացրեց, սակայն թռչուններն այնտեղ չգնացին:

«Ինչ-որ կերպ պետք է գրավել նրանց ու այստեղ բերել»,- մտածեց նա: Արագ վազեց տուն, հաց բերեց, փշրեց այն ու շաղ տվեց դեպի ցախատուն տանող ճանապարհին, սակայն ապարդյուն, թռչունները շարունակեցին ձյան մեջ կծկված մնալ: Նա փորձեց նրանց ներս քշել՝ նրանց շուրջը պտտվելով ու ձեռքերը թափահարելով: Բայց թռչունները ցախատան փոխարեն տարբեր կողմեր նետվեցին:

«Երևի ես տարօրինակ եմ թվում նրանց,- մտածեց մարդը,- ինչպե՞ս կարող եմ նրանց հասկացնել, որ կարող են վստահել ինձ: Ա՜խ, եթե կարողանայի մի քանի րոպեով թռչուն դառնալ, ապա կկարողանայի նրանց անվտանգ տեղ տանել»: Եվ հենց այդ պահին հնչեցին եկեղեցու զանգերը: Մարդը քարացավ տեղում՝ լսելով Սուրբ Ծննդյան բարի լուրն ավետող զանգերը: Հետո ընկավ ծնկների վրա: «Այժմ հասկանում եմ,- շշնջաց նա,- այժմ գիտեմ, թե Դու ինչու դա արեցիր»:

 

Ռուսերենից թարգմանությունը՝ Էմիլիա Ապիցարյանի

 

 

 

 

 

 

05.01.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․