Գրքեր

Տարին ավարտում և սկսում ենք պահքով

Տարին սկսում ենք Քրիստոսի Ծնունդը նշելով, իսկ տաղավար և տոների սկիզբը համարվող այս տոնին պատրաստվում ենք պահեցողությամբ, որ սկսվում է դեկտեմբերի 30-ից և տևում է մինչև հունվարի 5-ը: Քրիստոնեության վաղ շրջանում Սուրբ Ծննդյան տոնին նախորդել է պահքի երկարատև շրջան, որը տևում էր 50 օր: Այդ շրջանը կոչվում էր Հիսնակ և սկսվում էր Սուրբ Ծննդյան տոնին նախորդող 50-րդ օրվա մերձավոր երկուշաբթի օրը: Այժմ 50-օրյա այդ շրջանը բաժանված է երեք շաբաթապահքերի՝ երկշաբաթյա ընդմիջումներով միմյանցից առանձնացված: Երկու շաբաթապահքերից առաջինն սկսվում է Հիսնակի՝ Սուրբ Ծննդյան տոնին նախորդող 50-րդ օրվա մերձավոր երկուշաբթի օրը: Երկրորդ ու երրորդ շաբաթապահքերը նախորդում են Սուրբ Հակոբ Մծբնեցի հայրապետի և Սուրբ Ծննդյան տոներին: Դրանք տևում են մեկ շաբաթ:

Այսինքն՝ տարին ավարտում և սկսում ենք պահքով: Ամանորյա արձակուրդային այս օրերը, ըստ եկեղեցու տոնացույցի, ներհայեցողության օրեր են քրիստոնյա անհատի համար: Իսկ այսօր Ամանորն անխզելի կերպով կապված է մեծախորհուրդ տոնի՝ Սբ. Ծնունդի հետ: Քանի որ այժմ բոլոր քրիստոնյա ազգերը տարեմուտը տոնում են հունվարի 1-ին, և հունվար նշանակում է ծնունդ:

Սբ. Ծննդյան պահեցողությանն այսօր հակասող իրողություն է ամանորյա ճոխ սեղանը: Իսկ այդ հակասությունը, անաստվածության շրջանի հետևանքը լինելով, անգամ մեկդարյա պատմություն չունի՝ ի համեմատություն Սբ. Ծննդյան պահեցողության դարավոր ավանդույթի: Եկեղեցու հայրերի իմաստուն կարգավորությամբ պահքի այս օրերը նախապատրաստում են անձին հաղորդակցվելու և միավորվելու Սբ. Ծննդյան մեծագույն ուրախությանը: Պահքի ամեն մի օրը դա ապաշխարության, հոգու փրկության համար կատարված մի քայլ է, որ առաջնորդում է դեպի Աստված: Ողջ տարվա անցած-գնացած իրադարձությունները գուցե մի պահ առիթ են ստեղծում խորհելու այն կյանքի մասին, որ պարգևել է մեզ Աստված: Պահքը կյանքի այն կարևոր դադարներն են, որ փորձում են աշխարհային հորձանքից մեզ դուրս հանել, հոգևոր խաղաղություն և ազատություն պարգևելով, իմաստավորել մեր այս անցողիկ կյանքը:

Հոգևոր խորհրդածությամբ, աղոթքով և պահքով տարին սկսելու ավանդույթը դա Տիրոջ կողմից ևս մեկ հնարավորություն է վերադառանալու դեպի ինքներս մեզ՝ դեպի Աստվածային պատկերը և նմանությունը:

Այսինքն՝ տարին սկսում ենք հոգևոր ճամփորդությամբ, բայց և յուրաքանչյուրի ազատ կամքն է մասնակցել այդ ճամփորդությանը, թե՝ ոչ:

 

Կարինե Սուգիկյան

30.12.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․