Տոնդ շնորհավո՛ր, Աստծո սպասավո՛ր | Tond Shnorhavor Asttso Spasavor



Գրքեր

Տոնդ շնորհավո՛ր, Աստծո սպասավո՛ր

Հայ Առաքելական Սուրբ եկեղեցում Սուրբ Ղևոնդյաց տոնը հոգևորաց դասի տոնն է: Ուստի Սբ. Ղևոնդյաց բարեխոսությամբ, հայցենք Տիրոջից, որ Նրա հզոր Աջը պահապան ու զորավիգ լինի Քրիստոսի եկեղեցուն զինվորագրված մեր հոգևոր սպասավորներին:

Շնորհավորում ենք Ձեզ, Տիրոջ մշակնե՛ր, Ձեր անմնացորդ ծառայության և նվիրման համար՝ ուղղված հայ ազգի հոգևոր և բարոյական աշխարհի շինությանն ու հարստացմանը: Աստծո շնորհի և կոչման համաձայն՝ անցնում եք ուխտի մի ճանապարհ, որ անցավորից տանում է դեպի հավիտենականություն՝ դեպի Աստված:

«Ինչպես որ Հայրն Ինձ ուղարկեց, այնպես էլ Ես ձեզ եմ ուղարկում». Տիրավանդ այս առաքելությանը հավատարիմ՝ սերմանում եք և մշակում Ձեզ վստահված «հոգևոր անդաստաններում»: Աստվածապարգև Ձեր շնորհներով՝ որպես լեռներից բխող զուլալ աղբյուրներով, հագեցնում և ծաղկեցնում եք «պապակված հովիտներն ու դաշտերը»: Սբ. Ղևոնդյաց ոգով ներշնչված՝ հոգևոր պատերազմում որպես առաջնային մարտիկներ պաշտպանում և հսկում եք Ձեզ հանձնված հոտը: Որպես հոգիների ուսուցիչներ՝ ուսանում և ուսուցանում եք՝ հարստանալով կյանքի ճշմարտության Ակունքից:

Այս տոնի առթիվ մեր աղոթքն է առ Աստված, որ Հայոց երկրի Սուրբ տաճարներից ներս Սուրբ Խորանների առջև մշտապես հնչեն Քրիստոսի ներկայությունը խորհրդանշող պատարագիչ քահանաների բարեխոսական աղոթքները հանուն մեր զինվորյալ եկեղեցու: Եվ Տիրոջ օրհնությամբ թող եռապատկվեն Սբ. Ղևոնդյաց հետնորդներիդ անձնվեր ծառայության պտուղները, և Հայոց Սուրբ երկիրն ապրի այն երանությունը, որ նկարագրել է սաղմոսերգուն. «Երանի այն ժողովրդին, որը գիտակցում է Քո օրհնությունը, Տե՛ր, նա Քո երեսի լույսով պիտի ընթանա: Նա Քո անվամբ պիտի ցնծա գիշեր-ցերեկ, ու Քո արդարությամբ բարձր պիտի լինի: Դու ես պարծանքը մեր զորության, և մեր եղջյուրը Քո կամքով պիտի բարձրանա» (Սաղմոս 88:16-18):

 

 

Կարինե Սուգիկյան

06.02.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․