«Զորավոր» երիտասարդաց միությունը ոտքով ուխտի մեկնեց Ս. Էջմիածին

Մարդու ներքին՝ հոգևոր աշխարհից է կախված, թե ինչպիսին կլինի նրա կյանքը հավիտենության մեջ: Ինչ մարդ ցանում է, այն էլ կհնձի։ «Ով որ սերմանում է իր մարմնի անդաստանում, մահ կհնձի իր մարմնից, իսկ ով սերմանում է Սուրբ Հոգու անդաստանում, հավիտենական կյանք կքաղի Սուրբ Հոգուց», - ասել է Պողոս առաքյալը (Գաղ. 6։8)։ Ուստի նա, ով ձգտում է ապրել աստվածային պատվիրանների համաձայն, քաղում է հոգու համար ցանկալի փրկարար պտուղը՝ Աստծու հետ միավորումը: Հոգևոր անդաստանում իրենց աստվածահաճո կյանքով և գործունեությամբ սերմանում են նաև Հայ եկեղեցու սուրբ հարկից ներս գործող երիտասարդաց միությունները, որ իրենց լուման բերելով Քրիստոսահիմն եկեղեցուն՝ նպաստում են Աստծու տան շենացմանը: Կյանքի ճշմարիտ իմաստին հաղորդ երիտասարդների կյանքում ուխտի ուղիները հոգենորոգ ուղիներ են, որ զորացնում են նրանց գայթակղություններով լի այս աշխարհում:

Օգոստոսի 20-ին Զորավոր Ս. Աստվածածին եկեղեցու «Զորավոր» երիտասարդաց միությունը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, ոտքով ուխտագնացության մեկնեց Ս. Էջմիածին: Լուսադեմին երիտասարդները Զորավոր Ս. Աստվածածին եկեղեցու բակում միասնական աղոթքի կանգնեցին, ապա ճանապարհ ընկան դեպի Հայոց հոգևոր կենտրոն: Հայաստան և Արցախ աշխարհի խաղաղությանն ու անսասանությանն էր ուղղված նրանց աղոթքի ուղին: Մի քանի ժամ տևող ոտքի ճանապարհն ուխտավորները հաղթահարեցին և իմաստավորեցին աղոթքներով: Հասնելով Ս. Էջմիածին՝ «Զորավոր» երիտասարդաց միությունը Ս. Գայանե եկեղեցում մասնակից եղավ Սուրբ և Անմահ Պատարագին: Երիտասարդ ուխտավորները, միասնական աղոթք բարձրացնելով առ Տեր, Տիրոջ երկնառաք օրհնությունը հայցեցին համայն Հայոց ազգի համար, որպեսզի Ամենակալն Իր ամենազոր Աջով հովանի լինի Հայաստան և Արցախ աշխարհին՝ անխռով պահելով հայ ժողովրդի կյանքը:

«Երիտասարդությունը եկեղեցու կյանքում էական նշանակություն ունի: Ինձ համար երիտասարդությունը մարտահրավերներ ընդունելու քաջությունն է, այլ ոչ թե դրանցից խույս տալը: Երիտասարդներին հատուկ է որևէ բան փոխելու ձգտումը, նույնիսկ այն, ինչը միշտ համարվել է անխախտ: Եթե երիտասարդների մեջ այդպիսի վճռականություն կա, կարծում եմ, որ նրանք կգտնեն բոլոր ձևական արգելքները հաղթահարելու միջոցները և կբերեն այն թարմ օդը, որի կարիքն ունեն եկեղեցիները: Մի խոսքով, երիտասարդությանը պետք է վստահել…»,- ասել է երջանկահիշատակ Գարեգին Ա հայրապետը:

Կարինե Սուգիկյան