21 Հուլիս, Ուր, Վարդավառի պահքի Ե օր

Գրքեր
Հարց 59 – Ասացիք, թե նախասահմանվածների նախասահմանված լինելը հարկադրանքի տակ չի դնում նրանց, և քանի որ մարդ են, հնարավո՞ր է, որ մեղք մեջ ընկնեն:

Պատասխան - Այո՛, հնարավոր է, բայց քանի որ Աստված ի հավիտենից գիտի նրանց վախճանը, թեև ընկնեն, կարող են ելնել, և կմնան նույն նախասահմանության ներքո: Ահա քեզ օրինակ՝ երկու նախասահմանված սրբերի. մեկը՝ Դավիթը: Նա, հիրավի, նախասահմանված էր փառքի համար, սակայն սայթաքեց՝ քետացի Ուրիայի կնոջ՝ Բերսաբեի հետ շնանալով և սպանելով նրա ամուսնուն: Ահա երկու գլխավորագույն մեղքեր՝ շնություն և մարդասպանություն (Բ Թագ. 11): Բայց աստվածային շնորհը և ողորմածությունը զղջման կոչեցին նրան՝ Նաթան մարգարեի միջնորդությամբ: Ինքն էլ տեղի տալով այս հրավերին՝ ասաց. «Մեղանչել եմ Տիրոջ դեմ», իսկ Նաթանն ասաց. «Տերը ներեց քո մեղքերը և դու չես մեռնի» (Բ Թագ. 12:13, 14): Ահա նախասահմանյալն սայթաքեց, բայց, աստվածային շնորհին տեղի տալով, բարձրացավ:

Իսկ մյուս օրինակը Պետրոս առաքյալն էր: Նա նախասահմանված էր փառքի համար, բայց երեք անգամ ուրանալով Քրիստոսին՝ սարսափելի մեղքի մեջ ընկավ: Սակայն երբ նրան ևս, Նաթանի նման, Աստծուց ապաշխարության հրավեր ուղարկվեց, այնքան զղջաց ու ապաշխարեց, մինչև ինքն էլ, իր Վարդապետի նման, հանուն Նրա սիրո խաչվեց: Ահա նախասահմանյալի անկումը և շնորհով հառնելը:

Եթե կամենում ես իմանալ, թե ո՞րն էր Աստծուց՝ Պետրոսին հղված հրավերը, տե՛ս Ղուկասի Ավետարանը (22:61) «Շրջվեց Տերը և նայեց Պետրոսին»: Նույն Ավետարանիչը նույն տեղում վկայում է, որ այս հայեցողության շնորհին տեղի տալով՝ Պետրոս առաքյալը, Հիսուսի՝ իրեն նայելուց հետո, դուրս ելավ և արտասվեց դառնապես: Ուրեմն՝ նախասահմանյալները, ըստ որում անձնիշխան և ըստ որում՝ մարդ, կարող են սայթաքել և դարձյալ Աստծո շնորհներին տեղի տալով հառնել:

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․