«Աշխարհն ողորմությամբ պիտի շինվի»

Փետրվարի 8-ին՝ Մեծ պահքի առաջին օրը, Զորավոր Սբ. Աստվածածին եկեղեցու համայնքը հոգևոր հովիվ Տեր Գրիգոր քահանա Գրիգորյանի գլխավորությամբ սոցիալական ծրագրերի շրջանակներում այցելեց անապահով մի ընտանիք: Քառանդամ ընտանիքի երիտասարդ ծնողները հաշմանդամներ են, և ընտանիքի հայրը հիվանդությունների սրման պատճառով դարձել է անաշխատունակ: Տեր Գրիգորն ընտանիքի համար բժշկության աղոթք կարդաց, ապա հանձնեց համայնքի կողմից պատրաստված սննդի և հագուստի փաթեթներ ու հիգենիկ պարագաներ:

«Աստծուն հաճելի է այնպիսի պահքը, երբ այն հանդիսանում է նաև որպես անկեղծ զոհաբերություն մերձավորին օգնելու համար, այսինքն՝ ուղեկցվում է մերձավորի համար արվող աղոթքով և արդար գործերով: Յուրաքանչյուրս Քրիստոսի Մարմնի անդամներն ենք, իսկ Քրիստոսի Մարմինը եկեղեցին ինքն է (Ա Կորնթացիներ 12:27): Հիսուս Քրիստոս Իր երեքամյա քարոզչության ընթացքում Իր սերն ու գթությունը մշտապես արտահայտեց գործնական կերպով: Եվ եկեղեցին, Քրիստոսի օրինակի համաձայն, փորձում է արթուն և պատրաստ լինել կարիքի մեջ գտնվող անձին օգտակար լինելու համար: Այս կերպ Քրիստոսի Մարմնի անդամները պտղաբեր կյանք են ապրում Քրիստոսով, քանի որ «Մարմինը՝ Քրիստոսի եկեղեցին, իր բոլոր հոդերով և հոդակապերով հաղորդակցված և միացած է գլխին՝ Քրիստոսին և իր աճումն է ստանում այն աճումով, որ Աստծուց է» (Կողոսացիներ 2:19)»,- ասաց Տեր Գրիգորը:

Եկեղեցական համայնքային կյանքում բարի նպատակի շուրջ համախմբված անձինք նպաստում են Քրիստոսի Մարմնի՝ եկեղեցու, սիրո մեջ զորանալուն և արմատական աճին:

«Տիրոջ ողորմածությամբ է լցված երկիրը, Տերը ողորմություն է սիրում և աշխարհն ողորմությամբ պիտի շինվի»,- ասում է սաղմոսերգուն (Սաղմոս 32:5, 88:3):

Կարինե Սուգիկյան