Գրքեր

Դիտավորությունը

Մի տարեց կին իր տանն ընդունում է մի քանի ճամփորդների: Ուշ երեկոյան այդ մարդկանցից մեկը տեսնում է, թե տարեց կինը մոմի լույսի ներքո ինչպես է բացում իր գանձանակը, հանում ոսկեդրամները և հատ-հատ հաշվում: Այնուհետև ոսկեդրամները լցնում փոքր, թավշյա պարկի մեջ, դնում սեղանին և մի պահ հեռանում: Այս ճամփորդը նեղսրտում է, թե կյանքն ինչ անարդար է, թե ինչու այդ կինն այդքան հարուստ պիտի լինի: Մտածում է, թե ինչ ժլատ ու ագահ կին է և թշնամությամբ է լցվում նրա հանդեպ, ապա արագ մոտենում է, վերցնում թավշյա պարկը, դնում իր գրպանը և փորձում հեռանալ, սակայն սարսափած կանգ է առնում, որովհետև իր առջև Աստծո հրեշտակներին է տեսնում, որոնցից մեկն ասում է.

- Այս կինը մշտապես իր ունեցվածքից ծածուկ կերպով բաժին է հանում որբ ու անտուն երեխաներին, որոնց պահապան հրեշտակներն ենք, բայց դու այն գողացար: Մի՞թե արդարացի է քո քայլը: Այժմ, վերադարձրու նրան երեխաների համար նախատեսված գումարը՝ դրան ավելացնելով նաև քո ունեցած գումարից, որովհետև դու ավելի հարուստ ես, քան այդ կինը:

 

Պետք չէ որևէ մեկի հանդեպ թշնամությամբ ու ատելությամբ լցվել և դատել նրա արարքները, հատկապես երբ չգիտենք, թե մարդը սրտի ինչ դիտավորությամբ է գործում: Թշնամությունն ու ատելությունը նոր մեղքերի շղթաներ են ստեղծում...

 

 

Հովհաննես սրկ. Մանուկյան

04.09.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․