Ի՞նչ եմ արել...

Մի անիրավ մարդու բռնում-բերում են թագավորի մոտ և խիստ դատավճիռ կարդում երեք մեղքերի համար: Անիրավն առարկում է.

-Ի՞նչ եմ արել..., ընդամենը մեկ սխալ եմ գործել՝ քաղաքի մանկատան սնունդն եմ գողացել, իսկ դուք երեք մեղքերի համար եք ինձ դատում:

Թագավորը պատասխանում է.

- Երբ սխալդ տեսնում ես ու չես ուղղում, նշանակում է` արդեն երկրորդ մեղքն ես գործում: Եվ երբ այդ ամենի համար արդարանում ես, երրորդ մեղքն ես գործում:

Չապաշխարող մարդու յուրաքանչյուր մեղավոր ընթացքը դառնում է եռակի ծանր, երբ չի ուղղվում սխալ ճանապարհից, այլև՝ արդարանում է դրա համար:

Ավետարանն ասում է. «Ապաշխարեցե՛ք, որովհետև երկնքի արքայությունը մոտեցել է» (Մատթ. 4.17):

Հովհաննես Մանուկյան