Գրքեր

Չար աչք

Իր մեջ չարություն պարունակող նախանձը կարող է վնասել ուրիշներին: Դա էլ հենց չար աչքն է՝ դիվական ներգործությունը:

- Հա՛յր, իսկ մի՞թե Եկեղեցին ընդունում է չար աչքը:

- Այո՛, նույնիսկ հատուկ պահպանիչ աղոթք կա*: Չար աչքն ուրիշներին այն ժամանակ է վնասում, երբ մարդ ինչ-որ բան նախանձով է ասում:

- Հա՛յր, շատերը մեզնից թալիսման են խնդրում՝ նորածիններին չար աչքից պաշտպանելու համար: Կարելի՞ է այդպիսի թալիսմաններ կրել:

- Ո՛չ, չի՛ կարելի: Մայրիկներին ասացեք, որ երեխաները պետք է խաչեր կրեն:

- Հա՛յր, իսկ եթե որևէ մեկը մի հրաշալի իր պատրաստի, մեկ ուրիշը գովի նրան, առաջինն այդ գովեստը հպարտությամբ ընդունի և հետո այդ իրը ինչ-որ կերպ վնասվի, դա չար ա՞չք է:

- Ո՛չ, չար աչք չէ՛: Այդ դեպքում հոգևոր օրենքներն են սկսում գործել: Աստված վերցնում է մարդուց Իր շնորհը, և այդ պատճառով էլ վնասը տեղի է ունենում: Չար աչքը հազվադեպ է պատահում: Հատկապես նախանձի հետ միասին նաև չարություն ունեցող մարդիկ կարող են աչքով տալ ուրիշներին, իսկ այդպիսիք շատ չեն: Օրինակ՝ նախանձ կինը մի մայրիկի է տեսնում իր սիրունիկ բալիկի հետ ու չարությամբ ասում է. «Իսկ ինչո՞ւ ե՛ս այդպիսի երեխա չունեմ: Ինչո՞ւ է Աստված նրան տվել այդ երեխային»: Այդ դեպքում փոքրիկը կարող է տուժել՝ չի քնի, կսկսի լաց լինել, տանջվել, որովհետև այն կինը դա չարությամբ է ասել: Եվ եթե այդ երեխան հիվանդանար ու մահանար, ապա այդպիսի չար ու նախանձ կինը կուրախանար: Իսկ մեկ ուրիշն, օրինակ, ուրիշի հորթուկին է տեսնում, չափազանց շատ է ուզում, որպեսզի այն իրեն պատկանի և շուտով կենդանին սատկում է:

Սակայն հաճախ մայրն ինքն է մեղավոր, որ իր երեխան տանջվում է: Օրինակ՝ մայրն ուրիշի նիհարիկ երեխային է տեսնում ու ասում. «Ա՜յ քեզ վտիտ երեխա: Միայն կաշին ու ոսկորն է մնացել»: Իր երեխայով հիանում է, իսկ ուրիշինին վերևից է նայում: Բայց ուրիշի երեխայի մասին չարությամբ ասված խոսքերն իր սեփական զավակին են հարվածում: Եվ երեխան, մեղավոր չլինելով, տառապում է մոր պատճառով: Խեղճ երեխան աչքի առաջ հալումաշ է լինում՝ որպես պատիժ իր մորը, որպեսզի նա իր մեղքը գիտակցի: Բայց երեխան էլ, իհարկե, նման դեպքում մարտիրոսների շարքին է դասվում: Աստծու գործերն անհուն են:

 

* См. Εύχολόγιον Α. Άγιασματάριον. ΑΓΙΟΝ ΟΠΟΣ. 2001, Σ. 161. Старец неоднократно подчеркивал, что молитву "От презорства очес" может читать только священник.

 

Հայր Պաիսիոս Աթոսացի

Ռուսերենից թարգմանեց Էմիլիա Ապիցարյանը

27.05.23
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․