Երիտասարդների սիրո մեծությունն ուրախություն պատճառեց Անահիտ տատիկին

Հասարակությունն ամրանում և օրեցօր զորանում է իր այն անդամների շնորհիվ, որոնք գնահատել, պատվել ու հարգել գիտեն ավագ սերնդին: Քրիստոնեական հավատն այս մասին ուսուցանում է և ասում. «Արդ, հատուցեցե՛ք յուրաքանչյուրին իրենց պարտքերը. որին հարկ՝ հարկը, որին մաքս՝ մաքսը, որին երկյուղ՝ երկյուղը, որին պատիվ՝ պատիվը» (Հռոմ. 13:7): Հայր Պաիսիոս Աթոսացին նշել է, որ ծերերի հանդեպ խնամքը մեծ վարձք ունի. «Մարդկանց պատվով վերաբերվիր. տարիքով ավագին՝ իր տարիքի համար, կրտսերին՝ իր ակնածանքի համար: Մարդը, որ հոգևոր առումով առաջադիմում է, հարգանքով, մեծարանքով է վերաբերվում իրենից ավագին: Հարգանքի մեջ սեր կա»:

Զորավոր Ս. Աստվածածին եկեղեցու սոցիալական ծրագրերին իրենց մասնակցությունը բերած ամերիկահայ եկեղեցասեր մի քանի երիտասարդներ այս անգամ իրենց սերն ու հարգանքը ցուցաբերեցին Անահիտ տատիկի (76 տ.) հանդեպ: Երիտասարդների բարի մղումը խոսում է նրանց հայրենասեր ու ազգասեր լինելու մասին: Թեև նրանց վիճակվել է հայրենիքից հեռու ապրել, բայց նրանք չեն մոռացել իրենց հայրենիքն ու հայրենակիցներին, առավել ևս՝ ավագ սերնդին:

Մայիսի 3-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանն այցելեց Իսահակյան 38, բն. 41 հասցեում բնակվող Անահիտ տատիկին և նրան հանձնեց երիտասարդների կողմից տրամադրած դրամական աջակցությունը (200 ԱՄՆ դոլար): Անահիտ տատիկը զգացված էր Տեր Հոր այցից և երիտասարդների ուշադրությունից: Նա գոհություն հայտնեց Աստծուն, որ հայրենիքից հեռու նման հայրենասեր երիտասարդներ են ապրում և իր բարի մաղթանքն ու օրհնանքը հղեց նրանց: Երիտասարդներն արժանացան աստվածային օրհնության, քանի որ, Հայր Պաիսիոս Աթոսացու խոսքի համաձայն՝ սրտից բխած օրհնությունն աստվածային օրհնություն է:

Կարինե Սուգիկյան