Ճշմարտություն փնտրող միտքը շատ անգամներ կարող է հայտնվել բազում հարցերի առջև: Եվ այս դեպքում ամեն մի հարցի ճշմարիտ պատասխանը կարող է նոր ճանապարհ հարթել դեպի Ճշմարտությունը՝ դեպի Աստված. «Ե՛ս եմ ճանապարհը, ճշմարտությունը և կյանքը» (Հովհաննես 14:6):

Երբ մարդու սրտում թափանցում է Աստծո լույսը, և նա փորձում է իրապես ճանաչել իր Արարչին, ապա այդ ճանապարհին նրա սեղանի գիրքն է դառնում Սուրբ Գիրքը, կիրակին սրբացվում է Սբ. Պատարագի արարողության մասնակցությամբ, բարի գործերով, անհատական աղոթքին միանում է նաև ընդհանրական աղոթքը՝ ժամերգությունը, ամեն մի ուխտագնացություն դառնում է հավատքը նորոգելու հիանալի մի առիթ, աստվածային լույսի ներքո այլ են դառնում նաև մարդկային փոխհարաբերությունները: Եվ ամեն անգամ անքննելի Աստծո հետ հանդիպումը կարող է ի հայտ բերել բազում հարցեր:

Իսկ այս դեպքում կարևոր է այդ հարցերի պատասխանները ճիշտ աղբյուրից գտնել: Քանի որ պետք է զգուշանալ կամայական և քմահաճ մեկնություններից, որոնք դեպի հավիտենական կորուստ են առաջնորդում: Սբ. Պետրոս առաքյալն իր ընդհանրական երկրորդ նամակում Սբ. Պողոս առաքյալի նամակների և Սուրբ Գրքի հետ կապված գրում է. «Նա իր բոլոր նամակներում էլ խոսել էր այս բաների մասին: Այդ նամակներում կան մի շարք դժվարհասկանալի մասեր, որոնց իմաստը չարափոխում են տգետ և փոփոխամիտ մարդիկ: Նրանք չարափոխում են նաև մյուս Սուրբ Գրքերը՝ իրենց սեփական կորուստը պատրաստելով» (Բ Պետրոս 3:16):

Անչափ կարևորվում է, երբ Հայ Առաքելական Սուրբ եկեղեցու զավակը անտարբեր չէ և հետաքրքվում է, ուսումնասիրում թե՛ գրքերի գիրքը՝ Աստվածաշունչը, թե՛ մեր եկեղեցու դավանանքը, ծեսերն ու ավանդությունները:

Կայքի «Հարցեր քահանային» բաժինը նպատակ ունի հոգևորականի օգնությամբ առաջադրված հարցերի սպառիչ պատասխանները տալ՝ աղբյուր ունենալով Սբ. Գիրքը, եկեղեցու Սրբազան Ավանդությունը և եկեղեցու հայրերի աստվածաշնչային մեկնությունները:

«Հարցեր քահանային» բաժինը իր ենթաբաժիններով՝ ծիսական, աստվածաբանական խնդիրներ և հրեշտակներ, եկեղեցական իրողություններ, մեկնություն պահանջող աստվածաշնչային հարցեր, բարոյական առարկություններ անվանումներով, արդեն իսկ պատասխանել է մի շարք հարցերի կապված Աստծո բնության, Նրա անփոփոխ լինելու, Սբ. Երրորդության անձերից յուրաքանչյուրի, դժոխքի, մեղքի, անարդարությունների, նախախնամության և ճակատագրի, Սբ. Պատարագի, յոթ խորհուրդների, սրբերի, նրանց մասունքների և բարեխոսության, օրենքի, երդման, անեծքի, հայհոյանքի և այլնի վերաբերյալ:

Յուրաքանչյուր հարցի պատասխանը, հիմք ունենալով Սուրբ Գիրքը և մեր եկեղեցու հարուստ ժառանգությունը, հավատքի մեջ ամրապնդում և լուսավորում է մարդուն. «Քո խոսքը ճրագ է իմ ոտքերի համար և լուսավորում է իմ շավիղները» (Սաղմոս 118:105):

Կարինե Սուգիկյան