Նախարարի փորձությունը

Կեղծ մատնության պատճառով մի նախարարի մեղադրեցին ծանր հանցագործության՝ թագավորի դեմ կազմակերպած դավադրության, մեջ: Նա մեղավոր չէր և բոլոր հարցաքննությունների ժամանակ հերքում էր իր մասնակցությունն այս գործին:

Թագավորը որոշեց փորձել զրպարտված նախարարին, ու նրան հայտարարեցին թագավորի հետևյալ կարգադրությունը. «Եթե մեղադրյալը շարունակի համառորեն ժխտել իր մեղքը, ապա համառության ու չզղջալու համար մահապատժի ենթարկել նրան: Իսկ եթե խոստովանի դավադրության մեջ իր մասնակցությունը, ապա մահապատիժը ողորմածաբար փոխարինել ցմահ ազատազրկմամբ»: Իսկ դահճին ու պահակներին կարգադրեցին մահապատժի ենթարկել նախարարին, եթե ընդունի իր մեղքը և աքսորավայր ուղարկել, եթե շարունակի իր անմեղությունը պնդել:

Դահիճը նախարարի համար կարդաց թագավորական հրամանն ու ահարկու ձայնով ասաց.

- Վերջին խոսքդ ասա, եթե մեղավոր ես՝ ասա «այո» և ներում կստանաս: Իսկ եթե «ոչ» ասես՝ մահապատժի կենթարկվես՝ համառության ու չզղջալու համար:

Նախարարը լսեց հրամանն ու առանց տատանվելու ասաց.

- Ո՛չ:

Մահապատիժը չկայացավ:

Ռուսերենից թարգմանությունը՝ Էմիլիա Ապիցարյանի