Գրքեր

Ներկան իմաստավորել հավատքի գործերով

Կենդանի և գործուն սերն իր ճանապարհին կառուցում ու ամրացնում է ամեն ինչ: Սերն, ըստ Սուրբ Գրքի, ամբողջացնող շաղախն է ամեն ինչի (Կող. 3:14), Սուրբ Գրքի արքայական օրենքն է (Հակ. 2:8), Աստծու օրենքի կատարումը (Հռոմ. 13:8) և անկասկած իր մեջ կրում է ներկա և ապագա երանելի կյանքի խոստումը: Մարդկային կյանքն արագահոս գետի նման անցնում է ու գնում, անցյալը հնարավոր չէ վերադարձնել, ապագան անորոշ է, իսկ կյանքի ավարտն էլ հայտնի չէ, ուստի Քրիստոսի հետևորդը ջանում է իր ներկան ապաշխարությամբ և հավատքի գործերով իմաստավորել՝ քաջատեղյակ լինելով, որ Աստծու հետ միացյալ երանելի կյանքը ենթադրում է կատարյալ սեր ունենալ Նրա հանդեպ, որը նախևառաջ արտահայտվում է մերձավորի հանդեպ սիրով:

Սեպտեմբերի 2-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, եկեղեցու սոցիալական ծրագրերի շրջանակում, այցելեց հինգ հոգուց բաղկացած Հովհաննիսյան ընտանիքին, որ բնակվում է Րաֆֆու 111/26 հանրակացարանում: Կորոնավիրուսի համավարակի պատճառով ընտանիքը դժվարին կացության մեջ է հայտնվել: Երեք զավակների մայրը՝ Եղիազարյան Հեղինեն (29 տ.), նշեց, որ ամուսինը կորցրել է աշխատանքը, իրենց բնակարանը մեկ ամսով հոսանքազրկել են՝ էլեկտրաէներգիայի վարձը չվճարելու պատճառով, իսկ տրամադրվող ընտանեկան նպաստի գումարով կարողանում են միայն իրենց նվազագույն կարիքները հոգալ: Տեր Հայրը Հեղինեին փոխանցեց դրամական աջակցություն (50 000 դրամ), որ տրամադրել էին Հրաչ և Արման եղբայրները: Ընտանիքի մայրն իր երախտագիտությունը հայտնեց Տեր Գրիգորին և աջակից անձանց:

«Ներկա ժամանակների մարդկային կյանքն այնքան է նյութական տարրերով խեղդվել, երկրավոր երևույթներով նվաճվել, որ աստվածայինի հանդեպ սկսել է սառչել, հոգեղենի հանդեպ՝ ընդարմանալ, երկնայինից հեռանալ: Ժամանակը դեպքի պետք է վերածել, ինչպես մարդը՝ դեմքի… »,- ասել է երջանկահիշատակ Գարեգին Ա հայրապետը:

 

Կարինե Սուգիկյան

02.09.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․