1 Փետրվար, Դշ, Առաջավորաց պահքի Գ օր

Գրքեր

Տերը աղքատացավ, որ մենք հարստանանք

Տիրոջ կամքն է, որ յուրաքանչյուր ոք հավիտենական բարիքների ժառանգորդը դառնա, եթե միայն իր կամքով անհնազանդ չգտնվի տիրավանդ պատվիրանների հանդեպ՝ զրկվելով հավիտենական երանությունից: Իսկ հավիտենական բարիքների ժառանգորդ են դառնում հավատքով և բարի գործերին հետամուտ լինելով: Բարուն հետամուտ լինելու կարևորագույն սկզբունքն է, որ եկեղեցական համայնքներից ներս ձևավորում է սոցիալական մի շարք ծրագրեր, որ նպատակաուղղված են հոգևոր և նյութական աջակցություն ցուցաբերելու կարիքի մեջ հայտնված անձանց:

Ապրիլի 29-ին Զորավոր Ս. Աստվածածին եկեղեցում հոգևոր հովիվ Տեր Գրիգոր քահանա Գրիգորյանը, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, Սարգսյան Ռուզաննային (56 տ.) հանձնեց դրամական օգնություն (50 000 դրամ) և Արևի թատրոնի գեղարվեստական ղեկավար Արևիկ Յայլոյանի կողմից սննդի փաթեթ: Սարգսյան ընտանիքը բնակվում է Նուբարաշեն Ա-7 տարածքի 13 հողակտորում՝ տարրական կենցաղավարության պայմաններից զուրկ երկու սենյականոց տնակում: Տիկին Ռուզաննան չորս զավակ ունի, որոնցից ավագը՝ Նվերը (31 տ.), Դաունի համախտանիշ ունի: Նա նշեց, որ տղաներից երկուսն առողջական խնդիրներ ունեն և բուժման նպատակով մեկնել են Ռուսաստանի Դաշնություն, ինքը ևս առողջական խնդիր ունի, բայց ֆինանսական խնդրի պատճառով չի կարողանում բժշկի դիմել: Բազմանդամ ընտանիքն իր նվազագույն կարիքները փորձում է հոգալ Նվերին հատկացվող հաշմանդամության գումարով: Նվերը հաճախում է «Արև-երեխաներ» ՀԿ-ի Արևի թատրոն և թատրոնի լավագույն սաներից է: Նա ցանկանում է դերասան դառնալ: Տիկին Ռուզաննան շնորհակալություն հայտնեց աջակից անձին և Արևիկին՝ տրամադրած օգնության համար:

Աստվածնմանության ուղին ընտրած քրիստոնյան ողորմածության առաքինությամբ նմանվում է Ողորմած Աստծուն և հարստանում առաքինություններով՝ Տիրոջ շնորհի համաձայն. «Արդարև, գիտեք, որ մեր Տերը՝ Հիսուս Քրիստոսը, ինչպիսի՜ շնորհ արեց մեզ. Նա, որ հարուստ էր, աղքատացավ ձեզ համար, որպեսզի Իր աղքատանալով դուք հարստանաք» (Բ Կորնթ. 8:9): Պողոս առաքյալը, կրկին անգամ անդրադառնալով փրկչական շնորհին, նշում է. «Քանզի Աստված Իր շնորհը հայտնեց որպես փրկության միջոց բոլոր մարդկանց, շնորհ, որ խրատում է մեզ, որ մերժենք ամբարշտությունը և աշխարհիկ ցանկությունները, այս աշխարհում ապրենք զգաստությամբ, աստվածպաշտությամբ և ակնդետ սպասենք երանելի հույսին և փառքի հայտնությանը մեծն Աստծո և մեր Փրկչի՝ Հիսուս Քրիստոսի, որ Իր անձը տվեց մեզ համար, որպեսզի մեզ փրկի բոլոր անօրենությունից և մաքրի որպես իրեն սեփական ժողովուրդ՝ նախանձախնդիր բարի գործերի» (Տիտ. 2:11-14):

 

Կարինե Սուգիկյան

29.04.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․