Ապրիլի 2-ին Հայ եկեղեցու կամարների ներքո հնչեցին «Օրհնեալ, որ գայ յանուն Տեառն. օրհնութիւն ի բարձունս» փառաբանական խոսքերը, որոնք ազդարարեցին Քրիստոսի հաղթական մուտքը Երուսաղեմ: Ծաղկազարդի տոնը մեծ թվով ընտանիքների էր համախմբել Երևանի Զորավոր Ս. Աստվածածին եկեղեցում՝ մասնակիցը դարձնելու վաղ առավոտից մինչև երեկո կատարվող արարողությունների և տոնական միջոցառման: Վաղ առավոտյան Գիշերային և Առավոտյան ժամերգություններին հաջորդեց անդաստանի՝ աշխարհի չորս կողմերի օրհնության կարգը, որի ժամանակ օրհնվեցին և ներկաներին բաժանվեցին արմավենու ճյուղեր, ապա տոնական Ս. Պատարագ մատուցվեց, իսկ Երեկոյան ժամերգությունից հետո կատարվեց «Դռնբացեք»-ի արարողություն: Ներկաները տոնի խորհրդանիշ արմավենու ճյուղերով մասնակցեցին տոնական Սուրբ Պատարագին, որ մատուցեց Տեր Խորեն քահանա Պերթիզլյանը:
Տարիներ շարունակ Ծաղկազարդի տոնը, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ, հռչակվել է որպես մանուկների օրհնության օր: Հավարտ Ս. Պատարագի հոգևոր դասը եկեղեցու բակում կատարեց մանուկների օրհնության կարգ:
Այնուհետև Զորավոր Ս. Աստվածածին եկեղեցու «Զորավոր» կիրակնօրյա դպրոցի սաները հանդես եկան տոնական ելույթով. փառաբանական սաղմոսներ արտասանեցին, երգեցին, սաներից մեկը բալետային գեղեցիկ համարով ներկայացավ: Ներկաները ծանոթացան նաև կիրակնօրյա դպրոցի սաների՝ աստվածաշնչյան թեմաներով կատարված նկարչական աշխատանքներին:
Այս տարի ևս Զորավոր Ս. Աստվածածին եկեղեցու տիկնանց միությունը Ծաղկազարդի տոնը մանուկների համար վերածել էր ուրախ տոնախմբության: Եկեղեցու շրջափակը զարդարվել էր ծաղկազարդյան տեսարանի հարթապատկերներով, տոնական տաղավարներով և բազմազան խաղային դաշտերով: Տաղավարներից մեկում երեխաները հաղորդ էին դառնում հայկական ավանդական հացի՝ լավաշի պատրաստման ընթացքին. երկանքով ցորեն էին աղում, խմորի գունդ գրտնակում:
Հաջորդ տաղավարը, որ ապաշխարության խրատներով զարդարված ծառերի տաղավարն էր, առանձնահատուկ էր, քանի որ ծառերը թե՛ ծաղկած էին և թե՛ պտղաշատ: Տիկնանց միության ատենապետ Սաթենիկ Սիմոնյանն ասաց, որ ծառերի ծաղկաշատ և պտղաշատ լինելը պայմանավորված է նրանով, որ քրիստոնյային խորհրդանշող ծաղկած ծառը, սուրբգրային և եկեղեցու հայրերի պատգամներին անսալով ու կյանքի կոչելով, միանգամից պտուղ է տալիս: Այս տաղավարում տոնակատարության մասնակիցները զամբյուղներից վերցնում էին ապաշխարության վերաբերյալ որևէ խրատ, որ մեջբերված էր Զորավոր Ս. Աստվածածին եկեղեցու սպասավոր Աշոտ Արևշատյանի կողմից կազմած «Խրատանի ապաշխարության» գրքից:
Փոքրիկներին գրավել էր նաև հեքիաթի տնակը, որտեղ նրանք հանդիպեցին իրենց համար սիրելի հեքիաթի կենդանի հերոսին՝ Կարմիր Գլխարկին: Կարմիր Գլխարկը երեխաներին պատմում էր իր մասին հեքիաթը, իսկ տատիկի համար պատրաստած կարկանդակները բաժանում էր երեխաներին:
Փոքրիկների համար սիրելի անկյուն էր դարձել նաև բակի այն հատվածը, ուր նրանք գունավոր կավիճներով նկարում էին, ավազի հետ խաղում, օճառի պղպջակներ բաց թողնում:
Զորավոր Ս. Աստվածածին եկեղեցու կիրակնօրյա դպրոցի սաների, արև-երեխաների և բազմաթիվ մանուկների համար պատրաստված ուրախալի անակնկալները հաջորդում էին մեկը մյուսին. տոնական տորթը ճաշակելուց հետո հետաքրքիր խաղերով, երգ ու պարով մանուկների տոնական օրը հարստացրին «Բումբումիկ»-ի հերոսները: Իսկ տոնակատարության ավարտին ազգային երաժշտությունը հայկական ավանդական պարի շուրջը համախմբեց երեխաներին:
Սուրբ Գիրքը հորդորում է ծնողներին մեծացնել իրենց զավակներին Տիրոջ խրատով և ուսումով (Եփես. 6:4): Ծնողական առաքելության մեջ հաջողելու համար՝ Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը հետևյալ հորդորն է ուղղում ծնողներին. «Երեխաները մեր՝ ծնողներիս օրինակով են սովորում և հաճախ ուղղակի պատճենում մեր վարքը: Ուստի աստվածահաճո և առաքինի վարքն այն անգնահատելի հարստությունն է, որ կարող ենք փոխանցել մեր զավակներին: Դեռ վաղ մանկուց սովորեցնենք նրանց ճանաչել, սիրել ու վստահել մեզ անչափ սիրող, խնամող ու բարի Աստծուն: Սովորեցնենք չարը զանազանել բարուց, կեղծիքը՝ ճշմարտությունից: Երեխաների հոգում զարգացնենք սերը, բարությունը, ազնվությունը, կարեկցելու, ամաչելու կարողությունը, հեզությունը, երախտագիտության, պատասխանատվության զգացումը և նրանց Քրիստոսի հոգատար խնամքին հանձնենք՝ վստահ լինելով, որ բարի զավակներ կմեծանան առաջին հերթին Աստծու, ապա և մեզ համար, և Տիրոջ փառավոր գալստյան օրը նրանց շուրթերից հնչող «օվսաննա»-ները, հավիտենության մեջ տարածվելով, այլևս ուրիշ ոչնչի չեն փոխվի»:
Կարինե Սուգիկյան
Զորավոր Սուրբ Աստվածածին եկեղեցի