Գրքեր
Հարց 93 - Քանի՞ պատճառով է եկեղեցին պղծված համարվում, մինչև վերստին օծելու կարիք լինի:

Պատասխան – Ուսանելով աստվածաբան վարդապետներից՝ ասենք. նախ՝ եթե մարդասպանություն կատարված լինի եկեղեցում, վերստին պետք է օծվի:

Երկրորդ՝ եթե եկեղեցում անհավատի կամ բանադրվածի մարմին թաղված լինի, պետք է վերստին օծվի:

Երրորդ՝ եթե անպատշաճ և անհիշատակելի մեղք գործված լինի եկեղեցում, ինչպես՝ շնություն և այլն, պետք է վերստին օծել:

Չորրորդ՝ եթե եկեղեցու գլխավոր մասերն այրվեն, ինչպես ասենք պատերը, Սուրբ Սեղանը, ապա պետք է կրկին օծել, իսկ եթե միայն առաստաղն այրված լինի, վերստին օծման կարիք չկա, քանզի սկզբից էլ առաստաղը չի օծվում:

Հինգերորդ՝ եթե օծումից հետո Սուրբ Սեղանի վրա երկաթյա գործիքով գործ անելու հարկ լինի, պետք է վերստին օծում կատարել:

Վեցերորդ՝ եթե Սուրբ Սեղանը տեղից խախտվի կամ կոտրվի, պետք է վերստին օծել:

Յոթերորդ՝ այրված Սուրբ Սեղանը թեև ամբողջական մնացած լինի, պետք է օծումը կրկնել, սակայն միայն Սուրբ Սեղանը պետք է օծել և ոչ թե եկեղեցին, եթե վերոհիշյալ դեպքերը տեղի չեն ունեցել:

Ութերորդ՝ եթե ծեփը թափված լինի և նորից ծեփվի, այդ նորոգված տեղերը պետք է օծել:

Իններորդ՝ եթե եկեղեցին օծողը բանադրված լինի կամ հերետիկոսական աղանդի հետևած և Սուրբ Երրորդության կատարյալ հավատք չունենա, նրա կատարած մկրտությունն ու օծումն ընդունելի չեն, պետք է վերստին օծել:

Եթե ակամա կամ պատահական սպանություն եղած լինի, ինչպես, ասենք, պատահմամբ մեկի վրա քար ընկնի, և նա մեռնի, կամ թե մի խելագար, իրեն պատից գցելով, մեռնի, այս պատճառով պետք չէ եկեղեցին վերստին օծել:

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․